ამ ბრალს რომ მიყენებთ, რაღაცა ისეთი მაინც დაწერეთ, რომ ვიფიქრო, გჯერათ სინამდვილეში, რომ მოვიპარე, - ამის შესახებ "რუსთავი 2" - ის ყოფილმა გენერალურმა დირექტორმა ნიკა გვარამიამ სასამართლო სხდომაზე დასკვნით სიტყვაში განაცხადა. მისი თქმით, პროკურატურა მას ღიად ეუბნება, რომ თავადაც არ სჯერა წარდგენილი ბრალის, თუმცა მისი დაკავება უნდათ.
„2012 -2013 წლებში ქურდობასა და კორუფციაში რომ პასუხისმგებლობას მიყენებდით, მართლა სერიოზული პრობლემა იყო ჩემთვის. ამ ბრალდებამ ყოველგვარი გამამართლებელი განაჩენის მიუხედავად, დამანგრია. მართლა, მიუხედავად გამამართლებელი განაჩენისა, უბრალოდ შვილებთან მრცხვენოდა. ასეთია ჩემი მორალური ფასეულობები და რა ვქნა. ახლა ამ ბრალს რომ მიყენებთ, რაღაცა ისეთი მაინც დაწერეთ, რომ ვიფიქრო, გჯერათ სინამდვილეში, რომ მოვიპარე. ღიად რომ მეუბნებით, საერთოდ არ გვჯერა, დებილობაა, მაგრამ შენი დაჭერა გვინდაო, ხო არ შეიძლება ასე მოქმედება?!
კონტრაქტი ნებისმიერ შემთხვევაში იყო კანონიერი იმიტომ, რომ არავინ არ კრძალავს, მე 12 მილიონს მივცემ თუ 15 მილიონს მივცემ მომსახურე კომპანიას. ეს არავის საქმე არაა, მით უმეტეს, პროკურატურის,"- განაცხადა გვარამიამ.