ნაზი ჯანეზაშვილი - მოსამართლეთა სიაში ბევრი ისეთი ადამიანია, რომლებსაც არც კი ჰქონიათ სურვილი, უზენაესი სასამართლოს მოსამართლეები გამხდარიყვნენ

უზენაესი სასამართლოს მოსამართლეთა კანდიდატების სიაში ბევრი ისეთი ადამიანია, რომ არც კი ჰქონიათ ინტერესი და სურვილი, გამხდარიყვნენ უზენაესი სასამართლოს მოსამართლეები, თუმცა მაინც მოხვდნენ სიაში, მხოლოდ იმიტომ, რომ შექმნილიყო ფონი, თითქოს, ეს არის კონკურენცია", - ამის შესახებ იუსტიციის უმაღლეს საბჭოში სხდომის დაწყებამდე, საბჭოს არამოსამართლე წევრმა, ნაზი ჯანეზაშვილმა განაცხადა.

მან ისაუბრა იუსტიციის უმაღლეს საბჭოში უზენაესი სასამართლოს მოსამართლეთა კანდიდატებთან დღევანდელი გასაუბრებების შესახებ.

„ორ კანდიდატთან იქნება დღეს გასაუბრება, რომელთაგან არც ერთი არაა მოსამართლე - ერთი გახლავთ ადვოკატი და მეორე აკადემიური წრის წარმომადგენელი. ზოგადად, კარგია, რომ მრავალფეროვნება იყოს უზენაესი სასამართლოს შემადგენლობაში, ვინაიდან არ შეიძლება, მხოლოდ დაწინაურების პრინციპით იხელმძღვანელოს საბჭომ და მხოლოდ სააპელაციოს მოსამართლეები შეარჩიოს უზენაესი სასამართლოს თანამდებობისთვის, როგორც ეს გააკეთა დეკემბერში, როდესაც მან ათკაციანი სია დააკომპლექტა. კითხვები იქნება თითქმის იდენტური, რაც სხვა გასაუბრებაზე, რომელიც შეეხება კვალიფიკაციასა და კეთილსინდისიერებას, ორივე თანაბრად მნიშვნელოვანი კომპონენტია", -განაცხადა იუსტიციის უმაღლესი საბჭოს არამოსამართლე წევრმა.

მანვე ისაუბრა ზოგადად გასაუბრების პროცესის შესახებ და აღნიშნა, რომ უმნიშვნელოვანესია, არსებობდეს რეალური კონკურენცია.

"რაც შეეხება ზოგადად პროცესის შეფასებას, ჩემი მთავარი გულისტკივილია, რომ ეს არ არის რეალური კონკურენცია, ვინაიდან იუსტიციის უმაღლესმა საბჭომ სია გააჯერა მოქმედი მოსამართლეებით. ის 45 კაცი, რომელიც სახალხო დამცველის ანგარიშში ფიგურირებს, უმრავლესობას წარმოადგენენ მასში მოქმედი მოსამართლეები და ბევრი ისეთი ადამიანია, რომ ჩემი აზრით არც კი ჰქონიათ ინტერესი და სურვილი იმისა, რომ გამხდარიყვნენ უზენაესი სასამართლოს მოსამართლეები და ეს დაადასტურა გასაუბრებამ, რომელიც მათთან წარიმართა. თუმცა ისინი მაინც მოხვდნენ სიაში, მხოლოდ იმიტომ რომ თითქოს, ეს არის კონკურენცია, ასეთი ფონი რომ შექმნილიყო. ეს არის მთავარი, რომ შეიძლება ჩვენ 20 წელი არ დაგვჭირდეს ამ პროცედურის განხორციელება, რადგან მთლიანად დაკომპლექტდება უზენაესი სასამართლო და როდესაც უვადოდ დაინიშნებიან მოსამართლეები და ის რაოდენობა შეივსება, რაც კანონითაა დადგენილი, წლები ისე გავა, რომ აღარ იქნება საჭირო, საბჭომ ეს პროცესი განახორციელოს. ძალიან მნიშვნელოვანია, რომ ეს იყოს რეალური კონკურენცია და არა ხელოვნურად შექმნილი პროცესი", - აღნიშნა ჯანეზაშვილმა.

შეგახსენებთ, დღეს იუსტიციის უმაღლეს საბჭოში უზენაესი სასამართლოს მოსამართლეობის ორ კანდიდატთან - პაატა შავაძესთან და მორის შალიკაშვილთან იმართება გასაუბრება.

იხილეთ ვიდეო

ვიტალი ბალა - დარწმუნებული ვარ, რომ პუტინთან შეხვედრის შემდეგ ზელენსკი რუსეთის პრეზიდენტთან მიმართებაში ვარდისფერ სათვალეებს მოიხსნის
ქართული პრესის მიმოხილვა 10.12.2019
ბექა ინჯია - მაქსიმუმი უნდა გაკეთდეს იმისთვის, რომ არბიტრაჟისა და მედიაციის ინტიტუტების სტანდარტები საქართველოში მსხვილ ინვესტორთა მოთხოვნებს პასუხობდეს
"ორიონ ჯგუფმა" ვირტუალური ფული შექმნა - სიახლე სამშენებლო სექტორში
პროკრედიტ ბანკსა და არასამთავრობო ორგანიზაცია CENN-ს შორის თანამშრომლობის მემორანდუმი გაფორმდა
ახალი ეტაპი „ემბავუდის“ განვითარებაში