ჩრდილოეთ კორეის საკითხებში ამერიკის შეერთებული შტატების წარმომადგენელი სტეფან ბიგანი შესაძლოა, რუსეთში აშშ-ის ელჩად დაინიშნოს, - ამის შესახებ სააგენტო „როიტერსი“ სანდო წყაროზე დაყრდნობით წერს.

სააგენტოს ინფორმაციით, ელჩის თანამდებობაზე ბიგანის დანიშვნის გარშემო მსჯელობა მიმდინარეობს და ტრამპი, სავარაუდოდ, მასზე გააკეთებს არჩევანს.

აღნიშნულ ინფორმაციაზე კომენტარს ჯერჯერობით არც ბიგანი და არც აშშ-ის სახელმწიფო დეპარტამენტი აკეთებენ.

56 წლის სტეფან ბიგანს მიჩიგანის უნივერსიტეტში პოლიტიკური მეცნიერებისა და რუსული ენის ფაკულტეტები აქვს დამთავრებული. ის 1992-1994 წლებში მოსკოვში საერთაშორისო რესპუბლიკური ინსტიტუტის რეზიდენტი დირექტორი გახლდათ.