დემოკრატიული სახელმწიფო დამოუკიდებელი და ძლიერი სასამართლოს გარეშე წარმოუდგენელია და მოსამართლეებიც უნდა აკმაყოფილებდნენ იმ აუცილებელ კრიტერიუმებს, რაც კანონმდებლობითაა გათვალისწინებული, - ამის შესახებ იუსტიციის უმაღლეს საბჭოში გასაუბრებისას უზენაესი სასამართლოს მოსამართლეობის კანდიდატმა, თეა ძიმისტარიშვილმა განაცხადა.
მან გასაუბრების დაწყებისას ისაუბრა საკუთარი მოტივაციის შესახებ.
„ჩემი გადაწყვეტილება, ამ კონკურსში მიმეღო მონაწილეობა, განპირობებულია პირველ რიგში იმით, რომ გაცნობიერებული მაქვს ის უმნიშვნელოვანესი როლი, რაც აკისრია სასამართლოს ქვეყნის დემოკრატიული განვითარებისა და წინსვლის პროცესებში. წარმოუდგენელია დემოკრატიული სახელმწიფო დამოუკიდებელი და ძლიერი სასამართლოს გარეშე. შესაბამისად, მოსამართლეებიც უნდა აკმაყოფილებდნენ იმ აუცილებელ კრიტერიუმებს, რაც კანონმდებლობით არის გათვალისწინებული და მიმაჩნია, რომ ჩემი პროფესიული გამოცდილება მაძლევს საშუალებას, მოვსინჯო ძალები და მივიღო მონაწილეობა ამ კონკურსში", - განაცხადა ძიმისტარიშვილმა.