ინფრასტრუქტურის სამინისტრო რეგიონებში წყლის მიწოდების მომსახურებისა და ინსტიტუციური მართვის გაუმჯობესებაზე მუშაობს

რეგიონული განვითარებისა და ინფრასტრუქტურის სამინისტრო წყლის მიწოდების მომსახურებისა და ინსტიტუციური მართვის გაუმჯობესებაზე მუშაობს. ამის შესახებ „ინტერპრესნიუსს’’ რეგიონული განვითარებისა და ინფრასტრუქტურის სამინისტროდან აცნობეს.

ინფორმაციის თანახმად, ამ მიმართულებით არსებული მდგომარეობა ორ საპილოტე რეგიონში - გურიასა და მცხეთა-მთიანეთში, ამერიკელმა ექსპერტმა წყლის პოლიტიკის დარგში ქეილ ქეისმა, ადგილობრივ ექსპერტ ზურაბ ჯიქიასთან ერთად შეისწავლა და სარეკომენდაციო მოდელები წარმოადგინა.

პროექტი ამერიკის შეერთებული შტატების საერთაშორისო განვითარების სააგენტოს (USAID) ტექნიკური დახმარების ფარგლებში, დემოკრატიული მმართველობის ინიციატივის (GGI) პროგრამის საშუალებით ხორციელდება.

ამასთან, ექსპერტის მიერ შემუშავებული რეკომენდაციები ორგანიზაციული მართვის ახალ მოდელებზე გადასვლას ითვალისწინებს, რაც გულისხმობს რეგიონულ დონეზე მართვას და დასახლებების წყალმომარაგების ქსელით ეტაპობრივად უზრუნველყოფას.

სამუშაო შეხვედრაში საქართველოს რეგიონული განვითარებისა და ინფრასტრუქტურის მინისტრის მოადგილეები მზია გიორგობიანი და გრიგოლ კაცია, GGI - ის ქართული ოფისის ხელმძღვანელი ლევან სამადაშვილი მონაწილეობდნენ. ასევე, შეხვედრას ესწრებოდნენ პროექტით გათვალისწინებული საპილოტე რეგიონების სახელმწიფო რწმუნებულის ადმინისტრაციისა და მუნიციპალური წყალმომარაგების კომპანიების წარმომადგენლები.

ამასთანავე, შეხვედრაზე გაიმართა მსჯელობა იმ დასახლებებზეც, სადაც რთული რელიეფური მდებარეობის და მჭიდროდ დასახლებულ პუნქტთან სიშორის გამო, წყალმომარაგების ქსელით მიწოდება არაგონივრული და მიუწვდომელია.

ასეთ შემთხვევებში განიხილება სხვადასხვა სცენარი, მათ შორის მნიშვნელოვანი ყურადღება დაეთმო ადგილობრივი თემის გაძლიერებას, როგორც ტექნიკურად, ისე ადამიანური რესურსების თვალსაზრისით.

საქართველოს მთავრობის და დონორების და ფინანსებით ყოველწლიურად წყალმომარაგებისა და კანალიზაციის ქსელის მოწყობის მიმართულებით, ათობით პროექტი ხორციელდება.

ამის მიუხედავად, ქვეყნის მასშტაბით რჩება ბევრი დასახლებული პუნქტი, სადაც სუფთა წყლის მიწოდება ვერ ხერხდება და საკანალიზაციო ინფრასტრუქტურა გაუმართავია. ამის მიზეზი ათწლეულების განმავლობაში დაგროვილი პრობლემები და თავდაპირველად მოწყობილი სისტემების ამორტიზაციაა.

„ბოლო წლებში, რეგიონული განვითარებისა და ინფრასტრუქტურის სამინისტრო სხვადასხვა ტიპის გამოკითხვებს ატარებს მუნიციპალიტეტებში წყალმომარაგების საჭიროებებზე, ნაკლოვანებებსა და გამოწვევებზე.

აღსანიშნავია, რომ წლის დასაწყისში, თვითმმართველობების აქტიური ჩართულობით, საქართველოს ყველა რეგიონში, ჯამში 3 172 დასახლებულ პუნქტში, სამინისტრომ შეისწავლა არსებული სისტემების მდგომარეობა და გეო-საინფორმაციო სისტემაში ასახა“, - ნათქვამია ინფორმაციაში.

მაია ბითაძე - ევროპამ 50 წლით გაგვისწრო, მაგრამ ნაბიჯ-ნაბიჯ ჩვენც მივყვებით
ქართული პრესის მიმოხილვა 13.11.2019
ვახტანგ ძაბირაძე - ოპოზიციაში არ ჩანს ოპოზიციური ძალა, რომელიც ოპოზიციურად განწყობილი პოლიტიკური ძალებისა და ელექტორატის ლიდერი გახდებოდა
Volvo Art Night - ვოლვო საქართველო გლობალური მიზნების კვალდაკვალ (R)
Trade In! გადაცვალე ძველი ტექნიკა ახალში  - „ელიტ ელექტრონიქსის ახალი წამოწყება“
აღმოსავლეთ ევროპის უნივერსიტეტში საერთაშორისო სამეცნიერო ვორკშოპი - "საშიში ტრანსნაციონალური დანაშაულები და მასთან ბრძოლის ნაციონალური და ინტერნაციონალური სამართლებრივი გზები და საშუალებები” ჩატარდა
„სამ რაან სპა-ცენტრი“ ევროპის საუკეთესო სპად დასახელდა