პოლონეთში ამერიკული ჯარების განლაგება უფრო კარგად შეაკავებს რუსეთს, ვიდრე მათი ყოფნა დასავლეთ ევროპაში, - ამის შესახებ პოლონეთის საგარეო საქმეთა მინისტრმა იაცეკ ჩაპუტოვიჩმა განაცხადა.

„ამერიკული ჯარების ყოფნა პოლონეთში თამაშობს ძალიან მნიშვნელოვან, შემაკავებელ როლს, ბევრად უფრო მნიშვნელოვანს, ვიდრე მომავალშიც მათი ყოფნა დასავლეთში. რუსეთი კარგად დაფიქრდება, სანამ სამხედრო საშუალებებს გამოიყენებს, თუ დაინახავს საერთაშორისო ჯარების, მითუმეტეს ამერიკული ჯარის ყოფნას პოლონეთში“, - განაცხადა პოლონეთის საგარეო უწყების ხელმძღვანელმა.

საგარეო საქმეთა მინისტრმა იმედი გამოთქვა, რომ პოლონეთში აშშ-ის პრეზიდენტის დონალდ ტრამპის მომავალი ვიზიტის დროს, ამერიკელი ჯარისკაცების გარკვეული ნაწილის აღმოსავლეთ ევროპაში გადაყვანის გეგმები უფრო კონკრეტული გახდება.

ზაფხულის დასაწყისში ვაშინგტონი და ვარშავა ამერიკული უპილოტო სადაზვერვო თვითმფრინავების „MQ-9“-ის ესკადრილიის პოლონეთის ტერიტორიაზე განლაგებაზე შეთანხმდნენ. ამას გარდა, აშშ-მ გამოთქვა პოლონეთში ამაჟამად მყოფი ამერიკული 4,5 ათასიანი კონტიგენტის 5,5 ათასამდე გაზრდის სურვილი. აღნიშნული ამერიკული ჯავშანსატანკო ბრიგადა მრავალეროვნული საბატალიონო ჯგუფის შემადგენლობაში იმყოფება.

აღნიშნულ ინფორმაციას პოლონურ ტელეარხ Polsat-ზე დაყრდნობით „რია ნოვოსტი“ ავრცელებს.