„ის, რაც გუგუტიანთკარში ხდება, საოკუპაციო რეჟიმის მხრიდან დესტაბილიზაციის მორიგი მცდელობა და სამშვიდობო პროცესისთვის ხელის შეშლაა", - ამის შესახებ საგარეო ურთიერთობათა კომიტეტის თავმჯდომარემ, სოფიო ქაცარავამ განაცხადა, როდესაც სოფელ გუგუტიანთკარში საოკუპაციო ძალების მიერ ე.წ. ბორდერიზაციის პროცესის განახლებას და ასევე საქართველოს 8 მოქალაქის უკანონოდ დაკავებას გამოეხმაურა.
მისი თქმით, ხელისულება არის კონსოლიდირებული, ყველაფერს აკეთებს, რომ ეს პროცესი შეჩერდეს და უკანონოდ დაკავებული პირები დროულად გათავისუფლდნენ.
როგორც სოფიო ქაცარავამ აღნიშნა, ხელისუფლებას ამოქმედებული აქვს მის ხელთ არსებული ყველა მექანიზმი და იმ ვითარებაში, როდესაც საჭიროა მაქსიმალური კონსოლიდაცია, ოპოზიციის ნაწილი უსაფუძვლო ბრალდებებს აგრძელებს.
„ამოქმედებულია ჩვენ ხელთ არსებული ყველა საერთაშორისო მექანიზმი და ფორმატი, რომ უზრუნველყოფილ იქნას საერთაშორისო თანამეგობრობის ჩართულობა, რაც არის ჩვენი ერთ-ერთი მთავარი ბერკეტი ამ პროცესების შესაჩერებლად. რაც შეეხება ოპოზიციის შეფასებებს - იმ ვითარებაში, როდესაც საქმე ეროვნულ ინტერესებს ეხება და საჭიროა მაქსიმალური კონსოლიდაცია, ოპოზიციის ნაწილი კვლავ აგრძელებს უსაფუძვლო და უადგილო ბრალდებებს, რაც მიუღებელია“, - განაცხადა სოფიო ქაცარავამ.
აღნიშნულ ინფორმაციას საქართველოს პარლამენტის პრესსამსახური ავრცელებს.