მე ვერ ვიმუშავებ არხზე, სადაც მთხოვენ, რომ იქნებ რუსეთს ოკუპანტი არ ვუწოდო; სადაც მთხოვენ, რომ ბიძინა ივანიშვილის დენდროლოგიურ პარკზე ვთქვა, რომ ეს რა სასწაული ყოფილა, - ამის შესახებ „კურიერის“ წამყვანა პაატა იაკობაშვილმა აჭარის საზოგადოებრივი მაუწყებლის ეთერში განაცხადა. მან დაადასტურა, რომ არხიდან წასვლას ისიც აპირებს.

მისივე თქმით, კოლეგების აზრს იზიარებს და წუხს, რომ დღეს ეთერში არ იყო, რადგან შვებულებაშია.

„ეს ბიძინა ივანიშვილის დაკვეთაა, მას და მართველ პარტიას სურს ხავერდოვნად შეცვალონ რაღაცები, ასეთი სახე მისცენ, მაგრამ „კურიერის“ გუნდი მას ამის საშუალებას არ მისცემს“, - განაცხადა იაკობაშვილმა.

ამასთან, იგი არ გამორიცხავს, რომ მუშაობა ნიკა გვარამიასთან ერთად გააგრძელოს.

„მე პირველ რიგში უნდა შევხვდე ნიკა გვარამიას, ვნახოთ, რას შემომთავაზებს“, - განაცხადა იაკობაშვილმა.