ის, რომ ოკუპანტებმა გუგუტიანთკარში მავთულხლართების გავლება შეაჩერეს, არანაირ საფუძველს არ იძლევა ვთქვათ, რომ ოკუპაცია შეჩერდა, - ამის შესახებ საპარლამენტო უმრავლესობის ლიდერმა გია ვოლსკიმ ჟურნალისტებს განუცხადა.
როგორც ვოლსკიმ აღნიშნა, დღევანდელი ხელისუფლება წინა ხელისუფლების მიერ ჩადენილი დანაშაულების და შეცდომების გამო იმკის იმას, რაც დღეს ოკუპირებულ ტერიტორიაზე ხდება.
„იმ თემის წამოწევა ან ხმამაღლა საუბარი, რომ ოკუპანტებმა გუგუტიანთკარში მავთულხლართების გავლება შეაჩერეს, არანაირ საფუძველს არ იძლევა ვთქვათ, რომ ოკუპაცია შეჩერდა. ოკუპაცია მძიმე ტვირთად დახვდა ხელისუფლებას და ეს მძიმე ტვირთი განპირობებულია მძიმე დანაშაულებებით ან მძიმე შეცდომებით ან ორივეთი ერთად. ეს უნდა გვესმოდეს ყველას. დიახ, წინა ხელისუფლების დაშვებულ შეცდომებს და ჩადენილ დანაშაულებს ვგულისხმობ. იყო ძალიან მკაფიო მესიჯები ჯერ კიდევ 2005 წლიდან მოყოლებული სააკაშვილის ხელისუფლების მიმართ, რომ არ ემოქმედათ საგზაო რუკის საწინააღმდეგოდ, რაც დამტკიცებული იყო ეუთო-ს მინისტერიალის მიერ და აქტიურად იყო მხარდაჭერილი ამერიკის შეერთებული შტატების, ევროკავშირის, ევროსაბჭოს მნიშვნელოვანი ფინანსური და პოლიტიკური რესურსებით.
გუგუტიანთკარში საოკუპაციო ხაზის დაფიქსირება არის ერთ-ერთი მტკივნეული გამოვლინება იმ დანაშაულების, რაზეც მეკითხებით",- განაცხადა ვოლსკიმ.