ირანმა ახალი რაკეტა გამოსცადა, - ამის შესახებ ინფორმაციას სააგენტო „როიტერსი“ ირანის რევოლუციური გვარდიის მეთაურზე, გენერალ მაიორ ჰუსეინ სალამიზე დაყრდნობით ავრცელებს.
„ჩვენს ქვეყანაში სხვადასხვა თავდაცვითი და სტრატეგიული სისტემების დატესტვა მუდმივად ხდება და ჩვენი შემაკავებელი ძალის ზრდის მიზნით მუდმივად ქმედით ნაბიჯებს ვდგამთ“, - განაცხადა სალამიმ. მისივე თქმით, „გუშინდელი დღე ამ თვალსაზრისით, ქვეყნისთვის ერთ-ერთი წარმატებული დღე იყო“.
ჰუსეინ სალამის რაკეტის შესახებ სხვა ინფორმაცია არ გაუჟღერებია.
აშშ-სა და ირანს შორის ურთიერთობები განსაკუთრებით მას შემდეგ დაიძაბა, რაც გასულ წელს ვაშინგტონი ირანთან ბირთვული პროგრამის შესახებ 2015 წელს მიღწეულ შეთანხმებას გამოეთიშა და თეირანს დოკუმენტის პირობებით გაუქმებული სანქციები დაუწესა.
ირანმა სპარსეთის ყურეში მიმდინარე წლის ივნისში აშშ-ის სამხედრო დაზვერვის დრონი ჩამოაგდო, რამაც კონფლიქტი ორ სახელმწიფოს შორის კიდევ უფრო გაამწვავა. ირანის რესპუბლიკა აცხადებს, რომ დრონი მისი ტერიტორიის თავზე დაფრინავდა, რასაც ვაშინგტონი კატეგორიულად უარყოფს და ამტკიცებს, რომ ის საერთაშორისო საჰაერო სივრცეში იმყოფებოდა.
იხილეთ ვიდეო: ირანმა ახალი რაკეტა გამოსცადა