საფრანგეთის ქალაქ ბიარიცში „დიდი შვიდეულის“ სამიტის პარალელურად კლიმატის დამცველმა აქტივისტებმა და „ყვითელი ჟილეტის“ მოძრაობამ საპროტესტო აქციები გამართეს. მასში ასობით ადამიანი იღებდა მონაწილეობას. დემონსტრანტები უკმაყოფილებას გამოთქვამენ მსოფლიო ლიდერების ქმედებებით და ბრალს სდებენ ეკონომიკური და ეკოლოგიური პრობლემების გამწვავებაში. ისინი აცხადებენ, რომ დღეს როდესაც ბრაზილიაში ამაზონის ჯუნგლები ნადგურდება, ლიდერები მის შესაჩერებლად არაფერს აკეთებენ და ერთმანეთთან დაპირისპირებით არიან დაკავებულნი.
საპროტესტო აქცია პოლიციასთან შეტაკებაში გადაიზარდა, რის შემდეგაც სამართალდამცავებმა დემონსტრანტების მიმართ ცრემლსადენი გაზი და წყლის ჭავლი გამოიყენეს. სამიტის ფარგლებში მსოფლიო ლიდერთა უსაფრთხოებას 13 000-ზე მეტი პოლიციელი იცავს.