წინასწარი ინფორმაციით, ოკუპირებული აფხაზეთის „საპრეზიდენტო არჩევნების“ მეორე ტურში რაულ ხაჯიმბა და ალხაზ კვიწინია გავიდნენ.
აფხაზეთის დე ფაქტო ხელისუფლების ცენტრალური საარჩევნო კომისიის მონაცემებით, საარჩევნო უბნებში ამომრჩეველთა 56% მივიდა, რაც ნიშნავს, რომ „არჩევნები“ ჩატარებულად მიიჩნევა. კანდიდატების მიერ მიღებული ხმების გამოქვეყნება 12 საათისთვის არის დაგეგმილი.
„საპრეზიდენტო კანდიდატების“ შტაბების მიერ დათვლილი ხმების საფუძველზე ამ მომენტისთვის ცნობილია, რომ მეორე ტურში გავიდნენ მოქმედი „პრეზიდენტი“ რაულ ხაჯიმბა და პარტია „ამცახარას“ წარმომადგენელი ალხას კვიწინია.
კვიწინიას 100-დე ხმით ჩამორჩა ოლეგ არშბა, რომელმაც უკვე აღიარა დამარცხება და ალხას კვიწინიას წარმატება უსურვა.
ოკუპირებული აფხაზეთის დე ფაქტო „პარლამენტის“ თავმჯდომარემ ვალერი კვარჩიამ აფხაზ ხალხს არჩევნების ჩატარება მიულოცა. „ეს არჩევნები მიანიშნებს იმაზე, რომ აფხაზეთი შედგა როგორც დემოკრატიული სახელმწიფო“, - განაცხადა კვარჩიამ.
„საპრეზიდენტო არჩევნების“ მეორე ტური 8 სექტემბერს უნდა ჩატარდეს.
ამ ინფორმაციას „სპუტნიკ-აბხაზია“ ავრცელებს.
იხილეთ ვიდეო: ოკუპირებული აფხაზეთის ე.წ. საპრეზიდენტო არჩევნებზე მეორე ტური გაიმართება