საქართველოს წითელი ჯვრის საზოგადოებას, 29 აგვისტოს სამუშაო ვიზიტით ესტუმრება მსოფლიოს უდიდესი ჰუმანიტარული ქსელის, წითელი ჯვრისა და წითელი ნახევარმთვარის საზოგადოებათა საერთაშორისო ფედერაციის ვიცე-პრეზიდენტი, კერემ კინიკი. ამის შესახებ ინფორმაციას საქართველოს წითელი ჯვარი ავრცელებს.

მათივე ცნობით, კერემ კინიკი საქართველოს წითელი ჯვრის საზოგადოების პრეზიდენტთან, ნათია ლოლაძესთან ერთად, გამართავს ოფიციალურ შეხვედრებს მთავრობის წარმომადგენლებთან.

„მათთან ერთად განიხილება რუსთავში კატასტროფებისათვის მზადებისა და რეაგირების რეგიონული საწყობის მშენებლობის საკითხი, რომელიც საგანგებო სიტუაციების დროს დახმარებას გაუწევს კავკასიის (და არა მარტო) რეგიონის ქვეყნებს. მათივე ცნობით, ვიზიტის ფარგლებში, 15:00 საათზე, ქვემო ქართლის სამხარეო ადმინისტრაციაში, აღნიშნულ თემასთან დაკავშირებით ხელი მოეწერება ურთიერთთანამშრომლობის მემორანდუმს.

ღონისძიებას დაესწრებიან ქ.რუსთავის მერი ირაკლი ტაბაღუა, რუსთავის მერის მოადგილე გოჩა ლორია და ქონების მართვისა და ეკონომიკური განვითარების სამსახურის უფროსი პაატა პაპელიშვილი“, - აღნიშნულია წითელი ჯვრის მიერ გავრცელებულ ინფორმაციაში.