დიდი ბრიტანეთის დედოფალმა ელისაბედ მეორემ პრემიერ-მინისტრის ბორის ჯონსონის წინადადება დაამტკიცა, რომელიც ითხოვდა, დედოფალს პარლამენტის საქმიანობა სექტემბრის მეორე კვირიდან 14 ოქტომბრამდე შეეჩერებინა. ამის შესახებ „სქაი ნიუსი“ იუწყება.
დედოფლის კანცელარიის განცხადებაში აღნიშნულია, რომ ინგლისის პარლამენტში შესვენება 9 სექტემბერზე ადრე არ დაიწყება და 14 ოქტომბრამდე გაგრძელდება.
დიდი ბრიტანეთის მთავრობამ გაერთიანებული სამეფოს დედოფალს პარლამენტის მუშაობის დროებით შეჩერების თხოვნით მიმართა.
„ასეთ შემთხვევაში დედოფლის სიტყვით გამოსვლა, რომელიც მთავრობის გეგმის წარდგენას შეეხება, 14 ოქტომბრისთვის გადაიდება“, - განაცხადა პრემიერ-მინისტრმა ბორის ჯონსონმა.
ბრიტანეთის პარლამენტის მუშაობის შეჩერება, როგორც წესი, აპრილში ან მაისში ყოველწლიურად ხდება. ყველა დეპუტატი და მინისტრი პოსტს ინარჩუნებს, თუმცა ამ დროს კანონების განხილვა და კენჭისყრა არ ხდება. პარლამენტის მუშაობა ბოლო ორი წლის განმავლობაში ამ შემადგენლობის არჩევიდან 2017 წელს არ შეჩერებულა. ბრიტანეთის პრემიერს პარლამენტის მუშაობის შეჩერება შეუძლია. გადაწყვეტილებას მთავრობის თხოვნით დედოფალი იღებს და დეპუტატებს ხმის უფლება არ აქვთ.