შინაგან საქმეთა სამინისტრომ ქობულეთში მომხდარ ავტოსაგზაო შემთხვევაში მონაწილე მძღოლი დააკავა.

შეგახსენებთ, რომ 17 აგვისტოს, ქობულეთში მსუბუქი ავტომობილი ქვეითად მოსიარულე ცოლ-ქმარს ქვეითთა გადასასვლელზე დაეჯახა. 45 წლამდე ქალი ადგილზე გარდაიცვალა, მამაკაცი კი სასწრაფო დახმარების ბრიგადამ საავადმყოფოში გადაიყვანა.

შინაგან საქმეთა სამინისტროში დაკავების ფაქტს ადასტურებენ. როგორც „ინტერპრესნიუსს“ სამინისტროში განუცხადეს, 1990 წელს დაბადებული მამაკაცი საპატრულო პოლიციამ 276-ე მუხლის მე-7 ნაწილით დააკავა. გამოძიების ფარგლებში დადგინდა, რომ ის ავტოსაგზაო შემთხვევის დროს ავტომობილს ნასვამ მდგომარეობაში მართავდა. დანაშაული 9 წლამდე ვადით თავისუფლების აღკვეთას ითვალისწინებს.