პროკურატურა პეკინის ქუჩაზე 3 წლის ბავშვის დაჭრაში ბრალდებულის მიმართ აღკვეთის ღონისძიების სახედ პატიმრობას ითხოვს. ამის შესახებ ჟურნალისტებს სასამართლო სხდომის დაწყებამდე პროკურორმა გრიგოლ ნიშნიანიძემ განუცხადა. მისივე ინფორმაციით, ბრალდებულის მიმართ დანიშნულია ფსიქიატრიული ექსპერტიზა და დასკვნის მიღების შემდგომ იქნება შესაბამისი გადაწყვეტილება მიღებული.
"მოცემულ სისხლის სამართლის საქმეზე ბრალდების მხარე სასამართლოს მიმართავს შუამდგომლობით, ბრალდებულის მიმართ აღკვეთის ღონისძიების სახედ პატიმრობის გამოყენების თაობაზე დანაშაულის სპეციფიკის, კატეგორიის გათვალისწინებით",- განაცხადა ნიშნიანიძემ.
ცნობისთვის, თამარ საძაგლიშვილს ბრალი ოფიციალურად გუშინ წაუყენეს. მას საგამოძიებო უწყება 3 წლის ბავშვის ჯანმრთელობის განზრახ მძიმე დაზიანებასა და ასევე დაჭრილი არასრულწლოვნის დის ჯანმრთელობის განზრახ მძიმე დაზიანების მცდელობას ედავება.
შეგახსენებთ, რომ შემთხვევა პეკინის ქუჩაზე ორი დღის წინ მოხდა. მცირეწლოვანი მშობლებთან ერთად მოდიოდა, როცა ქალი მიიჭრა და სახის არეში დაჭრა. ქალი სამართალდამცავებმა რამდენიმე საათში დააკავეს. თბილისის საქალაქო სასამართლო ამ წუთებში აღკვეთის ღონისძიების თაობაზე მსჯელობს. პროცესს ბრალდებული თამარ საძაგლიშვილიც ესწრება.