საქართველოს საგარეო საქმეთა მინისტრმა დავით ზალკალიანმა შეხვედრა გამართა სან-ტომე და პრინსიპის ეროვნული ასამბლეის პრეზიდენტთან დელფიმ სანტიაგო დას ნევესთან და სან-ტომე და პრინსიპის საპარლამენტო დელეგაციასთან. ამის შესახებ „ინტერპრესნიუსს“ საგარეო საქმეთა სამინისტროდან აცნობეს.
მათი ინფორმაციით, შეხვედრაზე მხარეებმა ხაზი გაუსვეს საქართველოსა და სან-ტომე და პრინსიპის დემოკრატიულ რესპუბლიკას შორის შემდგომი ურთიერთობებისა და თანამშრომლობის გაღრმავებას როგორც ორმხრივ, ისე მრავალმხრივ ფორმატში. ასევე, საუბარი შეეხო ორ ქვეყანას შორის მაღალი დონის ვიზიტების განხორციელების აუცილებლობას, ჩვენს ქვეყნებს შორის პარლამენტთაშორისი ურთიერთობების განვითარების სამომავლო პერსპექტივებსა და მნიშვნელობას.
ეროვნული ასამბლეის პრეზიდენტმა დაადასტურა სან-ტომე და პრინსიპის მტკიცე მხარდაჭერა საქართველოს სუვერენიტეტისა და ტერიტორიული მთლიანობისადმი.
სტუმართან საუბრისას დავით ზალკალიანმა ყურადღება გაამახვილა საქართველოს წინაშე არსებულ გამოწვევებზე - ქვეყნის ოკუპირებულ ტერიტორიებზე უსაფრთხოებისა და ადამიანის უფლებების დაცვის თვალსაზრისით, შექმნილ რთულ ვითარებაზე, ასევე საოკუპაციო ხაზზე მიმდინარე უკანონო ბორდერიზაციის პროცესზე. ამასთან, საგარეო საქმეთა მინისტრმა ეროვნული ასამბლეის პრეზიდენტს მხარდაჭერისთვის მადლობა გადაუხადა.