პარლამენტში წარდგენილ ორ საკონსტიტუციო პროექტთან დაკავშირებით, რომელიც პროპორციულ საარჩევნო სისტემაზე გადასვლას გულისხმობს, ორი საყოველთაო-სახალხო განხილვის კომისია შეიქმნება, თუმცა იდენტური შემადგენლობით.
საკონსტიტუციო ცვლილებები პროექტების საორგანიზაციო კომისიების ფორმირების თაობაზე დადგენილების პროქტები პარლამენტის ბიუროს 2 სექტემბრის სხდომაზე წარედგინება.
კომისიები 13 წევრისგან შეიქმნება, შემდეგი შემადგენლობით: არჩილ თალაკვაძე (კომისიის თავმჯდომარე), თამარ ჩუგოშვილი, ირმა ინაშვილი, სერგი კაპანაძე, ანრი ოხანაშვილი, მამუკა მდინარაძე, ოთარ კახიძე, ირაკლი კობახიძე, თინათინ ბოკუჩავა, ხათუნა გოგორიშვილი, ლევან კობერიძე, თენგიზ შარმანაშვილი და თორნიკე ჭეიშვილი.
როგორც ცნობილია, უმრავლესობის 93 დეპუტატის ხელმოწერით წარდგენილი კონსტიტუციურ კანონში ცვლილებები 2020 წლის საპარლამენტო არჩევნების პროპორციული საარჩევნო სისტემითა და ნულოვანი ბარიერით ჩატარებას გულისხმობს. ამასთან, პროექტის მიხედვით, კონსტიტუციის გარდამავალი დებულებებიდან ამოღებულია ჩანაწერი 3%-ანი საარჩევნო ბარიერისა და პოლიტიკური პარტიების ბლოკების შესახებ. საარჩევნო სისტემასთან დაკავშირებით კონსტიტუციური ცვლილებების საკუთარ ვარიანტს პარლამენტს პოლიტიკური ოპოზიციური პარტიებიც სთავაზობს. მათი პროექტით, არჩევნები პროპორციული სისტემით ტარდება, თუმცა 3%-იანი ბარიერისა და პარტიების ბლოკების დაშვებით.