გვჯერა, პარტნიორებთან, ჩვენს საზოგადოებასთან ერთად ვქმნით მომენტს, როდესაც ტერიტორიული მთლიანობის აღდგენა გახდება შესაძლებელი, - ამის შესახებ პარლამენტის თავმჯდომარემ, არჩილ თალაკვაძემ ჟურნალისტებთან საუბრისას განაცხადა.
არჩილ თალაკვაძის თქმით, ხელისუფლების მიზანია ტერიტორიული მთლიანობის აღდგენა და ამ მიმართულებით ხელისუფლება ყველა მის ხელთ არსებულ ბერკეტს იყენებს.
"ხელისუფლება აკეთებს ყველაფერს, რომ პროვოკაციებზე, რომლებსაც ადგილი აქვს ე.წ დე ფაქტო ხელისუფლების მხრიდან, იყოს სათანადო რეაგირება. ხელისუფლება ყველაფერს აკეთებს, რომ საერთაშორისო საზოგადოების მობილიზაცია მოხდეს თითოეულ ფაქტთან და ტერიტორიულ მთლიანობასთან მიმართებით. ჩართულია და გამოიყენება ცხელი ხაზიც, ადგილზე გამოიყენება კონკრეტული პროგრამები. ჩვენი მიზანია საქართველოს ტერიტორიული მთლიანობის აღდგენა, მშვიდობიანი პოლიტიკის გზით იმ პირობებში, როდესაც საქართველოს აქვს საერთაშორისო საზოგადოების მაღალი მხარდაჭერა, როდესაც საქართველო ახდენს მისი დემოკრატიის, ეკონომიკის და შესაძლებლობების გაძლიერებას. გვჯერა, პარტნიორებთან, ჩვენს საზოგადოებასთან ერთად ვქმნით მომენტს, როდესაც ტერიტორიული მთლიანობის აღდგენა გახდება შესაძლებელი," - განაცხადა არჩილ თალაკვაძემ.