პარლამენტის ადამიანის უფლებათა დაცვის კომიტეტის თავმჯდომარის, სოფო კილაძის განცხადებით, უამრავ მშობელსა და ბავშვს სკოლის სახელმძღვანელოებთან დაკავშირებული პრობლემა აწუხებთ, რადგან ვერ იგებენ, რა წერია ამ სახელძღვანელოებში.
აღნიშნული საკითხი კილაძემ პარლამენტის განათლების, მეცნიერებისა და კულტურის, სპორტისა და ახალგაზრდულ საქმეთა და ჯანმრთელობის დაცვისა და სოციალურ საკითხთა კომიტეტების გაერთიანებულ სხდომაზე დასვა, სადაც მიხეილ ბატიაშვილს უსმენენ.
“მე ვახმოვანებ ძალიან ბევრი ადამიანის კითხვას სახელმძღვანელოებთან დაკავშირებით, რაც წლების განმავლობაში პრობლემა იყო და უამრავ მშობელსა და ბავშვს აწუხებს. ჩემთან როგორც მაჟორიტარ დეპუტატთან და კომიტეტის თავმჯდომარესთან ბევრი ადამიანი მოდის... ფაქტობრივად ვერ გებულობენ, რა წერია ამ სახელმძღვანელოებში. ჩვენ თუ ხარისხიანი განათლება გვინდა, ბუნებრივია, პედაგოგებთან ერთად ხარისხიანი სახელმძღვანელოები უნდა გვქონდეს. რას გეგმავთ ამ კუთხით და როდის იქნება ამ მიმართულებით ხელშესახები შედეგი, როცა ჩვენი ბავშვები გაიგენებ, რა წერია სახელმძღვანელოებში და ეს სახელმძღვანელო მათ კრიტიკულ აზროვნებას განუვითარებს“, - მიმართა მიხეილ ბატიაშვილს სოფო კილაძემ.