თავდაცვის მინისტრობის კანდიდატის ირაკლი ღარიბაშვილის მინისტრის პოსტზე ყოფნისას, ერთ-ერთი მთავარი საზრუნავი „ჯარისკაცების ყოფა“ იქნება. ამის შესახებ ღარიბაშვილმა საკომიტეტო მოსმენაზე სამთავრობო პროგრამის წარდგენისას განაცხადა. მისივე თქმით, ჯარისკაცებს გაუუმჯობესდებათ საცხოვრებელი პირობები და მოემატებათ ხელფასები.
„მეორე ჩემი მთავარი საზრუნავი იქნება ჩვენი ჯარისკაცების ყოფა, მე განსაკუთრებულ ყურადღებას გავამახვილებ: წესრიგზე, დისციპლინაზე, მათ კვებაზე, მათ აღჭურვილობაზე, მათ შეიარაღებაზე. ვიზრუნებთ მათი საცხოვრებელი პირობების გაუმჯობესებაზე. ვიზრუნებთ მათი სოციალური პირობების გაუმჯობესებაზე: იქნება ეს ხელფასების ზრდა, იქნება ღირსეული ჯანდაცვის პაკეტი, ღირსეული დაზღვევა. ასევე ვიზრუნებთ ინფრასტრუქტურის განვითარებაზე. მე მუდმივად მექნება კომუნიკაცია და მუდმივ მონიტორინგს განვახორციელებ, რომ ჩვენ ბაზებზე იყოს თანამედროვე მსოფლიო სტანდარტების შესაბამისი ინფრასტრუქტურა. ჩვენ შევიტანთ მეტ სპორტს მეტ ტრენინგს მეტ სწავლებას ჯარში“, - განაცხადა ირაკლი ღარიბაშვილმა.