მოსამართლე ირაკლი კოპალიანმა პაატა ბურჭულაძის სარჩელი კობა დავითაშვილის წინააღმდეგ ცილისმწამებლური ინფორმაციის უარყოფის მოთხოვნით არ დააკმაყოფილა. ამის შესახებ „ინტერპრესნიუსს“ პაატა ბურჭულაძის ადვოკატმა მარიამ ჩიქოვანმა განუცხადა.
მისი თქმით, დაახლოებით ერთი წლის წინ, „ტვპირველის“ პირდაპირ ეთერში კობა დავითაშვილმა პაატა ბურჭულაძეს უპოვარი ბავშვების ფულის მოპარვა დააბრალა. მსოფლიო ბანმა მას ცილისწამებისთვის სასამართლოში უჩივლა.
„აღნიშნული გადაწყვეტილება, ჩვენს მიერ იქნება გასაჩივრებული სააპელაციო სასამართლოში და თუ საჭირო გახდება ევროპულ სასამართლოშიც. ეს განაჩენი კიდევ ერთი დასტური იყო იმისა, რომ პროცესი პოლიტიკურია და პაატა ბურჭულაძის დისკრედიტაციას ისახავს კვლავ მიზნად. კობა დავითაშვილის ყველა განცხადება და გამონათქვამი იყო აშკარა ცილისწამება და ჰქონდა ყველა სამართლებრივი ნიშანი ცილისწამების კვალიფიკაციის მისანიჭებლად, როგორც საქართველოს კანონმდებლობით, ისე ევროპის სასამართლო პრაქტიკის შესაბამისად. მან ვერ წარმოადგინა მის მიერვე დაანონსებული მტკიცებულებებიც. აქვე შეგახსენებთ, რომ პროკურატურამ 2 წლის ძიების მიუხედავად, ვერანაირი დარღვევა ან დანაშაული ვერ აღმოაჩინა ფონდ „იავნანაში“. საქართველოს კონსტიტუციით მონიჭებული გარანტია „ადამიანის ღირსება ხელშეუვალია და მას იცავს სახელმწიფო“ (მუხლი 9) - მხოლოდ დეკლარაციად რჩება. სიმართლე აუცილებლად გაიმარჯვებს, ჩვენ არ დავნებდებით, გავასაჩივრებთ ზემდგომ ინსტანციებშიც და თუ საჭირო გახდება სტარსბურგის ადამიანის უფლებათა ევროპულ სასამართლოშიც“, - განაცხადა ჩიქოვანმა.