სახელმწიფო ინსპექტორის სამსახურში სტაჟირების სისტემა დაინერგება. პროკურატურის სისტემაში არსებული სტაჟირების სისტემის მსგავსად, სახელმწიფო ინსპექტორის სამსახურის სტაჟიორ–გამომძიებელი უფლება-მოვალეობებით გათანაბრებული იქნება სახელმწიფო ინსპექტორის სამსახურის გამომძიებლის უფლება-მოვალეობებთან.
„სახელმწიფო ინსპექტორის სამსახურის შესახებ“ კანონში დაგეგმილი ცვლილებების პროექტით, სახელმწიფო ინსპექტორის სამსახურში, სტაჟიორის თანამდებობაზე პირის დანიშვნა შესაძლებელი იქნება კონკურსის საფუძველზე. ამასთან, სტაჟიორ-გამომძიებელზე გავრცელდება გამომძიებლის საკვალიფიკაციო მოთხოვნები.
სტაჟიორ-გამომძიებელს სახელმწიფო სპეციალური წოდება არ მიენიჭება და მას არ ექნება ცეცხლსასროლი იარაღის, ასევე სპეციალური საშუალებების შენახვის, ტარებისა და გამოყენების უფლება.
პროექტის ავტორი და ინიციატორები არიან პარლამენტის წევრები: ანრი ოხანაშვილი, თამარ ჩუგოშვილი, მამუკა მდინარაძე, დავით მათიკაშვილი, ვანო ზარდიაშვილი, გურამ მაჭარაშვილი, სოფო კილაძე, გოგა გულორდავა, რატი იონათამიშვილი და ირაკლი (დაჩი) ბერაია.
საკანონმდებლო პაკეტი 10 სექტემბრის ბიუროს სხდომაზე იქნება ინიცირებული.