შალვა თადუმაძე ღირსეული ადამიანია, რომელიც საკუთარი ქვეყნის სამსახურში თავს კიდევ ბევრჯერ გამოიჩენს - არ ვიცი, რა პოზიციაზე, - ასე უპასუხა უმრავლესობის ლიდერმა გია ვოლსკიმ კითხვას, დაუჭერს თუ არა უმრავლესობა მხარს შალვა თადუმაძეს უზენაესი სასამართლოს თავმჯდომარის პოსტზე.

“შალვა თადუმაძეს 2011 წლიდან ვიცნობ. არ მახსოვს თემა, რა ფორმატშიც არ უნდა ყოფილიყო კამათი თუ მსჯელობა, გინდ ბიძინა ივანიშვილის თავმჯდომარეობით, გინდ სხვა ფორმატში - შალვას მტკიცე პოზიცია არ ჰქონოდა. ის ყოველთვის უკომპრომისო იყო, თუკი სხვა აზრი გააჩნდა. პროფესიონალიზმთან ერთად, მას ეს თვისებაც მოჭარბებულად აქვს“, - განაცხადა გია ვოლსკიმ.

გენერალური პროკურორი შალვა თადუმაძე იუსტიციის უმაღლესი საბჭოს მიერ პარლამენტში დასამტკიცებლად წარდგენილ უზენაესი სასამართლოს მოსამართლეობის კანდიდატთა სიაშია.