9-10 სექტემბერს „ერთიანი ნაციონალური მოძრაობის“ თავმჯდომარე გრიგოლ ვაშაძე და საერთაშორისო ურთიერთობების დეპარტამენტის ხელმძღვანელი ირაკლი ქავთარაძე ვიზიტით ბრიუსელში იმყოფებოდნენ, სადაც მონაწილეობა მიიღეს ევროპის სახალხო პარტიის (EPP) პოლიტიკურ ასამბლეაში,- ამის შესახებ „ინტერპრესნიუსს“ „ერთიანი ნაციონალური მოძრაობიდან“ აცნობეს.
მათივე ინფორმაციით, ვიზიტის ფარგლებში პარტიის ლიდერებმა შეხვედრები გამართეს EPP-ის პრეზიდენტ ჟოზეფ დოლთან, ევროპარლამენტის სხვადასხვა ფრაქციების ლიდერებთან და ევროკომისიის საგარეო ქმედებათა სამსახურის წარმომადგენლებთან.
„შეხვედრებზე განიხილეს საქართველოში მიმდინარე პოლიტიკური მოვლენები, ეკონომიკური მდგომარეობა, დემოკრატიის ხარისხის მკვეთრი ვარდნა, მედიის თავისუფლების შეზღუდვა და „რუსთავი 2“-ის ოლიგარქის მიერ ხელში ჩაგდება, 20 ივნისის მოვლენები და იმ ადამიანების პატიმრობა, რომლებიც საკუთარი კონსტიტუციური უფლებების დასაცავად იბრძოდნენ.
ასევე საუბარი შეეხო რუსეთის მიერ აფხაზეთისა და ცხინვალის რეგიონის ოკუპაციას და კრემლის მხრიდან საქართველოს დამოუკიდებლობისა და სუვერენიტეტის წინააღმდეგ მიმდინარე საფრთხეებს, საქართველოსა და ევროკავშირს ურთიერთობებს შორის მიმდინარე აქტუალურ საკითხებსა და ქვეყნის ევროკავშირთან კიდევ უფრო დაახლოების პერსპექტივას“, - ნათქვამია გავრცელებულ ინფორმაციაში .