მამუკა ხაზარაძისა და ბადრი ჯაფარიძის ადვოკატები „მუქარის წერილის“ ექსპერტიზის დასკვნის შინაარსზე დღეს დაგეგმილ შეხვედრაზე ისაუბრებენ. ამის შესახებ „ინტერპრესნიუსს“ ინფორმაცია ადვოკატმა ზვიად კორძაძემ დაუდასტურა.

ადვოკატების, ზვიად კორძაძისა და ეკატერინე ეგუტიას შეხვედრა „არასამთავრობო ორგანიზაციათა კოალიციასთან“ დღეს, 13.00 საათზე, ადამიანის უფლებათა ცენტრის ოფისში გაიმართება. შეხვედრაზე მამუკა ხაზარაძის და ბადრი ჯაფარიძის წინააღმდეგ მიმდინარე სისხლის სამართლის საქმეზე და ხაზარაძისთვის გაგზავნილი მუქარის წერილთან დაკავშირებით ლონდონიდან მიღებული ექსპერტიზის დასკვნაზე ისაუბრებენ.

„იმ ფონზე, როცა „თიბისი ბანკის“ დამფუძნებლების წინააღმდეგ მიმდინარე გამოძიება ბევრ ლეგიტიმურ კითხვას აჩენს, კოალიციის მიზანია დეტალურად გაეცნოს საქმეში არსებულ მასალებს, მტკიცებულებებზე დაფუძნებული, დამოუკიდებელი და მიუკერძოებელი შეფასების მომზადებისათვის“,- ნათქვამია „დამოუკიდებელი და გამჭვირვალე მართლმსაჯულებისთვის” კოალიციის მიერ გავრცელებულ ინფორმაციაში.