საქართველოს საგარეო საქმეთა მინისტრი დავით ზალკალიანი 11-13 სექტემბერს უზბეკეთის რესპუბლიკას ეწვევა. ამის შესახებ „ინტერპრესნიუსს“ საგარეო საქმეთა სამინისტროდან აცნობეს.

მათივე ინფორმაციით, ვიზიტის ფარგლებში, საგარეო საქმეთა მინისტრი შეხვედრას უზბეკეთის რესპუბლიკის ვიცე-პრემერთან აზიზ აბდუხაკიმოვთან, საგარეო უწყების ხელმძღვანელთან აბულაზიზ კამილოვთან და უზბეკეთის რესპუბლიკის ოლი მეჯლისის სენატის თავმჯდომარის პირველ მოადგილესთან სოდიკ საფოევთან გამართავს. ამასთან, დავით ზალკალიანი საქართველო-უზბეკეთის დიპლომატიური ურთიერთობების დამყარების 25 წლის იუბილესთან დაკავშირებულ ღონისძიებაში მიიღებს მონაწილეობას.

„აღსანიშნავია, რომ საიუბილეო თარიღთან და საქართველოს დამოუკიდებლობის დღესთან დაკავშირებით უზბეკეთის რესპუბლიკაში საქართველოს საელჩოს ორგანიზებით ტაშკენტში გაიმართება მასშტაბური კულტურული ღონისძიება საქართველოს ხელოვნების სფეროს მოღვაწეების მონაწილეობით. ღონისძიებაზე მიწვეულნი არიან უზბეკეთის აღმასრულებელი და საკანონმდებლო ხელისუფლების წარმომადგენელები, უზბეკეთში აკრედიტებული დიპლომატური კორპუსი, საქართველოს პარლამენტის წევრები, უზბეკეთის კულტურისა და ბიზნეს წრეების წარმომადგენლები“, - ნათქვამია ინფორმაციაში.