პარლამენტის თავმჯდომარის პირველი მოადგილე თამარ ჩუგოშვილი მიიჩნევს, რომ მამუკა ხაზარაძისა და ბადრი ჯაფარიძის "მუქარის წერილზე" ექსპერტიზის დასკვნა მხარეებმა პროკურატურას უნდა მიაწოდონ, რათა საგამოძიებო უწყებამ შესაბამისი სამართლებრივი გეგმით იმოქმედოს.
როგორც ჩუგოშვილმა ჟურნალისტებს განუცხადა, ვარაუდებზე, იმის თაობაზე, იქნება თუ არა წერილზე პრემიერ-მინისტრის გიორგი გახარიას ანაბეჭდი, კომენტარს ვერ გააკეთებს. ამასთან პარლამენტის თავმჯდომარის პირველი მოადგილე აღნიშნავს, რომ ის ექსპერტიზის შედეგებსაც არ იცნობს და შესაბამისად, დეტალებზე საუბარი გაუჭირდება.
„ექსპერტიზის შედეგი შეიძლება განხილული იქნას როგორც მტკიცებულების ერთ-ერთ ელემენტად ან გარკვეულ ინფორმაციად, რომელიც შეიძლება გამოძიებისთვის ღირებული იყოს კონკრეტულ საქმეზე გამოძიების საწარმოებლად. მე არ ვიცი ამ დასკვნაში რა წერია. მიაწოდონ მხარეებმა პროკურატურას და პროკურატურა შესაბამისი სამართლებრივი გეგმით იმოქმედებს", - განაცხადა ჩუგოშვილმა.