მამუკა არეშიძე ჩორჩანასთან მიმდინარე მოვლენებზე - ხელისუფლება უნდა მუშაობდეს კულუარებში და საერთაშორისო პარტნიორებთან

მესმის საზოგადოების გაღიზიანება იმის გამო, რომ ხელისუფლება საჯარო სივრცეში აქტიური არაა, მაგრამ მეორე მხრივ, განცხადებებით ეს სიტუაცია არ შეიცვლება, - ამის შესახებ „ინტერპრესნიუსს“ უსაფრთხოების საკითხებში ექსპერტმა მამუკა არეშიძემ საოკუპაციო ძალების მიერ სოფელ ჩორჩანას განაპირას, საქართველოს კონტროლირებად ტერიტორიაზე მეორე საგუშაგოს მშენებლობაზე საუბრისას განუცხადა.

როგორც არეშიძე აღნიშნავს, მნიშვნელოვანია ამ საკითხზე ხელისუფლება მუშაობდეს კულუარებში და საერთაშორისო პარტნიორებთან.

„ჩვენთვის მთავარი უნდა იყოს მუშაობს თუ არა შესაბამისი მიმართულებით ხელისუფლება, კულუარებში საერთაშორისო პარტნიორებთან ან თუნდაც მოსკოვთან. ჩვენ უნდა გვესმოდეს, რომ მოსკოვს თავისი პოლიტიკური დღის წესრიგი აქვს, რომელსაც განუხრელად აგრძელებს. ის ყოველთვის რეაგირებს იმ გამოწვევებზე, რომელიც ჩნდება საქართველოსთან დაკავშირებით და აქედან გამომდინარე მოქმედებს. მაგალითად, რასმუსენის განცხადება ამ ტიპისაა. მე იმას არ ვამბობს, რომ მისი განცხადების გამო დაიწყეს მშენებლობა, რომელიც ალბათ, გაცილებით ადრე იყო დაგეგმილი, მაგრამ ჩვენ ვიცით, რომ რუსეთისთვის ძალიან მნიშვნელოვანია საქართველოს ნატო-ში არგაწევრიანება, აქედან გამომდინარე ყველა ეს ქმედება ამ კონტექსტში უნდა განვიხილოთ“, - განაცხადა მამუკა არეშიძემ.

ხაშურის მუნიციპალიტეტში, გამყოფ ხაზთან მდებარე სოფელ ჩორჩანას განაპირას, საოკუპაციო ძალების წარმომადგენლები საგუშაგოების მოწყობას ორ ლოკაციაზე აგრძელებენ. ხაშურის მერის წარმომადგენლის, ვაჟა ლომიძის თქმით, დე ფაქტო რეჟიმის წარმომადგენლებმა აღნიშნულ ლოკაციებზე ხის ფარდულები დადგეს.

პაატა ზაქარეიშვილი - რუსეთი ცხინვალის რეგიონში აქტიურობით ცდილობს აიძულოს საქართველო რაღაც ფორმით გადავიდეს მოსკოვთან დიალოგის ფორმატზე
ქართული პრესის მიმოხილვა 16.09.2019
მეთიუ ბრაიზა - დიდი პრობლემაა, რომ დონალდ ტრამპი ხშირად არც კი უსმენს მის მთავარ მრჩევლებს, რომლებიც ამბობენ - „ყურადღება მიაქციეთ საქართველოს“
დენიელ ფრიდი - ამერიკა არც „პროსააკაშვილურია“ და არც „პროივანიშვილური“, ჩვენ საქართველოს მხარეს ვართ
სუპერმარკეტების ქსელი „მაგნიტი“ გრანდიოზულ წამახალისებელ გათამაშებას იწყებს
გალფი ტურისტული ზონების დასუფთავების მასშტაბურ აქციას იწყებს