„ერთიანი ნაციონალური მოძრაობის" წევრის ზურაბ მელიქიშვილის განცხადებით, მმართველი გუნდის მხრიდან ანაკლიის პორტზე და „თიბისი ბანკის“ მფლობელებზე ზეწოლა რუსეთში ტამანის პორტის მშენებლობას უკავშირდება და ამრიგად, „ქართული ოცნება“ საკუთარ ქვეყანას ღალატობს.

აღნიშნული მოსაზრება ზურაბ მელიქიშვილმა დღეს „ნაციონალური მოძრაობის“ ოფისში ჩატარებულ ბრიფინგზე ვიდეომასალასთან ერთად წარმოადგინა.

„ბიძინა ივანიშვილი და „ქართული ოცნება“ ხელისუფლებაში მოსვლის დღიდანვე ყველაფერს აკეთებენ, რადგან შესუსტდეს საქართველოს სახელმწიფოებრიობა, მისი ეკონომიკა და საქართველო იყოს დამოკიდებული მის ჩრდილოელ მეზობელზე. წლების განმავლობაში ძალიან ბევრი ნაბიჯი იდგმება მათი მხრიდან, რომელიც უშუალოდ რუსული დოქტრინის შესაბამისობაშია და ითვალისწინებს რუსეთის ინტერესებს, მუდმივად ხელისუფება აპელირებს იმაზე, რომ ოპოზიციას უბრალოდ ახირება აქვს, როდესაც ვსაუბრობთ ღალატზე. მინდა წარმოგიდგინოთ ფაქტი, რომელიც არის ღალატის პირდაპირი დადასტურება საქართველოს ხელისუფლების მხრიდან", - განაცხადა ზურაბ მელიქიშვილმა.

მისი განმარტებით, ტამანის პორტის ერთადერთი კონკურენტი და პირდაპირი ალტერნატივა იქნებოდა ანაკლიის პორტი, ამიტომ, ხელისუფლებისთვის მთავარი ამოცანა არის ის, რომ ნებისმიერი გზით ანაკლიის პორტის მშენებლობა გაჩერდეს.

„ის, რაც უნდა ყოფილიყო საქართველოსთვის ახალი სუნთქვა, „ქართულმა ოცნებამ“ გაცვალა რუსულ ინტერესებში. დღეს პროექტი, რომელიც უნდა ყოფილიყო საქართველოს ერთგვარი გადარჩენა არის დაპაუზებული, ხოლო პროექტი, რომლის გამოც გააჩერეს ანაკლიის პორტი, რუსეთის იურისდიქციაში ხორციელდება და ისინი იმ მილიარდებს, რომელიც საქართველოში უნდა შემოდინებულიყო მიიღებენ თავად,“ - განაცხადა ზურაბ მელიქიშვილმა.