საქართველოში უკრაინის ელჩმა იგორ დოლგოვმა განაცხადა, რომ ორი ქვეყნის პრეზიდენტებისა და პრემიერ-მინისტრების ვიზიტები იგეგმება, ხოლო მინისტრთა კაბინეტის წევრებს ერთმანეთთან სისტემატიური კონტაქტები აქვთ.

„საქართველოს ახალ მთავრობას ცოტა დრო სჭირდება პრემიერის ვიზიტის მოსამზადებლად. პრეზიდენტი ზურაბიშვილი შეხვდა პრეზიდენტ ზელენსკის ვარშავაში და ისინი შეთანხმდნენ ორმხრივ ვიზიტებზე დედაქალაქებში. იგივე შეეხება მთავრობის მეთაურების ვიზიტსაც და იმედი გვაქვს, რომ გააქტიურდება საპარლამენტთაშორისო თანამშრომლობაც, როგორც ეს ადრე იყო. ურთიერთობაზე მხოლოდ პირველი პირების ვიზიტები არ მეტყველებს. საქართველოს და უკრაინის მთავრობის წევრებს სისტემატიური კონტაქტი აქვთ ერთმანეთთან. საგარეო საქმეთა მინისტრები გუშინაც ელაპარაკნენ ერთმანეთს ტელეფონით. სხვა მინისტრბსაც ხშირი კონტაქტი აქვთ“, - განაცხადა უკრაინის ელჩმა ჟურნალისტის კითხვის პასუხად.