ევროკომისიის პრეზიდენტმა ჟან-კლოდ იუნკერმა განაცხადა, რომ ბრიტანელები ნაწილობრივი ევროპელები არიან, რომლებიც არასოდეს ყოფილან სრულად ევროკავშირში.
„ბრიტანელები თავიდანვე ნაწილობრივ ევროპელები იყვნენ, ჩვენ რაც გვჭირდება, ესაა სრული ევროპელები. ბრიტანელებს 40 წელზე მეტია ეუბნებოდნენ, რომ ისინი ევროკავშირში იყვნენ, თუმცა, მათ არასოდეს სურდათ ყველა იმ პოლიტიკის გაზიარება, რომელიც ერთად წყდებოდა“, - განაცხადა ჟან-კლოდ იუნკერმა.
მისივე თქმით, ბრიტანეთის სურვილი დატოვოს ევროკავშირი მისი მმართველობის მარცხი არაა. ევროკომისიის პრეზიდენტმა ასევე აღნიშნა, რომ ბრექსითი იქნება თანაბრად წამგებიანი დიდი ბრიტანეთისა და ევროკავშირისთვის.
შეგახსენებთ, ჟან-კლოდ იუნკერი ევროკომისიის პრეზიდენტის პოსტს 2014 წლიდან იკავებს, მას 1-ელი ნოემბრიდან ოფიციალურად ახალი პრეზიდენტი ურსულა ფონ დერ ლეიენი შეცვლის.