პარლამენტის გარემოს დაცვის კომიტეტში, საცირკო წარმოდგენებში ცხოველების მონაწილეობის აკრძალვის, ასევე ცხოველების საჯარო სივრცეში მოკვლის, მათ შორის მსხვერპლშეწირვის აკრძალვის თაობაზე სამუშაო ჯგუფი შეიქმნება.
კომიტეტის დღევანდელ სხდომაზე მოქალაქეთა ორი პეტიცია განიხილეს, რომელიც ამ საკითხებს შეეხებოდა.
კომიტეტმა პეტიციებზე უარი თქვა, თუმცა როგორც კომიტეტის თავმჯდომარემ კახა კუჭავამ განაცხადა, პარლამენტში შეიქმნება სამუშაო ჯგუფი, სადაც ჩართულები იქნებიან არასამთავრობო ორგანიზაციები, ექსპერტები, სხვადასხვა უწყების წარმომადგენლები.
სამუშაო ჯგუფის მიერ დამუშავებული წინადადება კი, კომიტეტს განსახილველად წარედგენება.