თბილისის სახელმწიფო სამედიცინო უნივერსიტეტის მედიცინის ფაკულტეტის მე-6 სემესტრის სტუდენტები ათა-თურქის სახელობის უნივერსიტეტში (თურქეთი, ერზრუმი) იმყოფებოდნენ, სადაც საზაფხულო სკოლაში მიიღეს მონაწილეობა.

როგორც „ინტერპრესნიუსს“ თბილისის სახელმწიფო სამედიცინო უნივერსიტეტიდან აცნობეს, პროექტი თურქული ენის საფუძვლების შესწავლას, სხვადასხვა კულტურის გაცნობასა და დაახლოებას ისახავდა მიზნად, ვინაიდან პროექტში მონაწილეობას რუსეთის, უკრაინის, იორდანიის, მალაიზიის, ყირგიზეთისა და პაკისტანის სხვადასხვა უნივერსიტეტის წარმომადგენლები იღებდნენ.

„პროექტის ფარგლებში, რამდენიმე სემინარი თურქულ ენასა და ლიტერატურაში ჩატარდა, ამასთანავე, გაცნობითი ხასიათის ლექციები გაიმართა ეკონომიკაში, კომპიუტერულ ტექნოლოგიებში, აგროკულტურასა და გარემოს დაცვაში. ქართველმა სტუდენტებმა თურქეთის წამყვანი სამეცნიერო-კვლევითი ცენტრი-,,Daytam“-ი დაათვალიერეს, სადაც უახლესი სამედიცინო და სამეცნიერო აპარატურა დაათვალიერეს. გარდა აკადემიური ნაწილისა, პროექტი დატვირთული იყო კულტურული და გასვლითი ღონისძიებებით.

პროექტის დასასრულს თსსუ-ის სტუდენტებს საშუალება მიეცათ წარედგინათ საკუთარი ქვეყანა და უნივერსიტეტი. ასევე, მოახდინეს პროექტის - ,,Spend Your Summer in Georgia” პოპულარიზაცია და მოუწოდეს დამსწრე საზოგადოებას, რომ აუცილებლად ესტუმრონ საქართველოს“, - ნათქვამია ინფორმაციაში.