ილიას სახელმწიფო უნივერსიტეტსა და განათლების კოალიციას შორის ურთიერთთანამშრომლობის მემორანდუმი გაფორმდა. შეთანხმებას ხელი ილიას სახელმწიფო უნივერსიტეტის რექტორმა, გიგა ზედანიამ და განათლების კოალიციის გამგეობის თავმჯდომარემ, ირინა ხანთაძემ მოაწერეს. ინფორმაციას ილიას სახელმწიფო უნივერსიტეტი ავრცელებს.
მემორანდუმი განათლების კოალიციის მიერ ორგანიზებული პროექტის „მასწავლებლის ეროვნული ჯილდო“ მხარდაჭერასა და ორგანიზაციების თანამშრომლობას კონკურსის წარმართვასთან დაკავშირებული ღონისძიებების უზრუნველყოფის საკითხებში ითვალისწინებს.
ღონისძიებათა ფარგლებში თანამშრომლობა მიზნად ისახავს განათლების სისტემაში ჩართულ პირთა დაფასებას, მათი დამსახურების აღიარებას, სფეროს პოპულარიზაციასა და მეტი პროფესიონალის მოზიდვას.
მასწავლებლის ეროვნული ჯილდო განათლების კოალიციის ინიციატივით 2017 წელს დაწესდა და მიზნად ისახავს წარმატებული მასწავლებლების გამოვლენას, საზოგადოებისთვის მათ წარდგენას და ამ გზით პროფესიის პრესტიჟის ზრდას. ის მასწავლებელთა პოპულარიზაციისკენ მიმართული გლობალური კამპანიის „The Global Teacher Prize“ ნაწილია.