სოფიო ქაცარავა გიგა ბოკერიას - კარგი შოუ დადგით - მთელი თქვენი ნიჭი ამისკენ უნდა მიმართოთ, რადგან ეს უკეთ გამოგდით, ვიდრე საგარეო პოლიტიკის მართვა

ძალიან საინტერესო და კარგი შოუ დადგით. ვფიქრობ, მთელი თქვენი ნიჭი ამისკენ უნდა მიმართოთ. ეს გაცილებით უკეთ გამოგდით, ვიდრე საგარეო პოლიტიკის მართვა, - ამ სიტყვებით საგარეო ურთიერთობათა კომიტეტის თავმჯდომარე სოფიო ქაცარავამ „ევროპული საქართველოს“ წევრს გიგა ბოკერიას მიმართა.

დეპუტატები ერთმანეთს სიტყვიერად ევროინტეგრაციის კომიტეტის სხდომაზე დაუპირისპირდნენ, სადაც „ევროპული საქართველოს“ დადგენილების პროექტის განხილვა მიმდინარეობდა.

ქაცარავამ ბოკერიას ხმადაბლა საუბრისკენ მოუწოდა და აღნიშნა, რომ ისტერია არ არის საჭირო, როდესაც საუბარი საქართველოს ტერიტორიულ მთლიანობას და ოკუპაციას შეეხება. ამასთან, როგორც სოფო ქაცარავამ აღნიშნა, სანამ „ევროპულ საქართველოს“ იტყოდა, მცირე პაუზა და დაფიქრება დასჭირდა, რომ არ შეშლოდა და ამის ნაცვლად „ნაციონალური მოძრაობა“ არ ეთქვა.

„ძალიან საინტერესო და კარგი შოუ დადგით. ვფიქრობ, მთელი თქვენი ნიჭი ამისკენ უნდა მიმართოთ. ეს გაცილებით უკეთ გამოგდით, ვიდრე საგარეო პოლიტიკის მართვა, როდესაც თქვენ ამის შესაძლებლობა გქონდათ. ასევე, ბატონო გიგა, გთხოვთ ხმადაბლა ისაუბროთ. ისტერია ნამდვილად არ არის საჭირო, როდესაც ისეთ მნიშვნელოვან საკითხებზე ვლაპარაკობთ, როგორიც არის ტერიტორიული მთლიანობა და ოკუპაცია.

ზუსტად იმიტომ ვარ „ქართულ ოცნებაში“, რომ ყოველთვის წინააღმდეგობაში მოვდიოდი იმ პოლიტიკასთან, რაც თქვენს პარტიას „ნაციონალურ მოძრაობას“ ჰქონდა,“ - განაცხადა სოფიო ქაცარავამ.

ოპოზიციონერმა დეპუტატმა მას კითხვით მიმართა, „ნაციონალური მოძრაობის“ პოლიტიკას ყოველთვის ეწინააღმდეგებოდა თუ არა და შეეხებოდა თუ არა ეს ნატო-ში ინტეგრაციასაც. თავის მხრივ, სოფიო ქაცარავამ ბოკერიას მიმართა, „ნუ იჩემებს ნატო-ში ინტეგრაციას“.

„თქვენი კომპლიმენტები მივიღე ჩემს არტისტულ თვისებებზე და ამ თვისებებს ვავლენ, მაგრამ ამ კითხვას ვერ გაექცევით. უჭერთ თუ არა მხარს, რომ რუსეთს დააკისროს ევროკავშირმა და შტატებმა სანქციები, როცა ისინი ჩვენს მოქალაქეებს კლავენ. ხომ მარტივი კითხვაა? მე ვუჭერ. თქვენ?“ - მიმართა ბოკერიამ ქაცარავას. სოფიო ქაცარავას განცხადებით კი, ხელისუფლება ყველაფერს აკეთებს ანტისაოკუპაციო მიმართულებით და ამაზე ოპოზიციის კარნახი არ სჭირდება.

ვაჟა ბერიძე - გაუგებარია საზოგადოების რა ნაწილს წარმოადგენს მმართველი ძალა და ვისთვისაა „ოცნების“ ხელისუფლებაში დარჩენა სისხლხორცეულად აუცილებელი
ქართული პრესის მიმოხილვა 19.10.2019
თენგიზ ფხალაძე - ვინც ანაკლიის პორტის მიზანშეწონილობას ეჭვქვეშ აყენებს, იქნებ იმაზეც დაფიქრდეს, რატომ აჩქარებს რუსეთი ტამანში საკუთარი პორტის მშენებლობას?
აჭარული სოფლები და მთები, როგორც ოთხივე სეზონის ტურისტული პროდუქტი
სილქნეტი მედიასივრცეში გავრცელებულ ბოლოდროინდელ ბრალდებას ეხმიანება სატელეკომუნიკაციო ბაზარზე ოლიგოპოლიასთან დაკავშირებით
„ლიბერთი ბანკის“ მხარდაჭერით, ახალი, ინოვაციური ონლაინ პლატფორმა - onoff.ge შეიქმნა
„ჯიპიაი ჰოლდინგი“ ყველა ავტომფლობელს სტიქიური რისკებისგან დაზღვევას უფინანსებს