რუსეთი უკრაინას ანექსირებულ ნახევარკუნძულ ყირიმს ზუსტად ისე დაუბრუნებს, როგორც საბჭოთა კავშირმა ბალტიის ქვეყნებს დაუბრუნა დამოუკიდებლობა, - ამის შესახებ აშშ-ს სახელმწიფო დეპარტამენტის სპეციალურმა წარმომადგენელმა უკრაინის საკითხებში კურტ ვოლკერმა უკრაინული ტელეარხის „1+1“-სთვის მიცემულ ინტერვიუში განაცხადა.

„ჩვენ ვნახეთ, ეს ბალტიის სახელმწიფოებთან მიმართებაში როგორც მოხდა. საბჭოთა კავშირმა მათ დამოუკიდებლობა 40-წლიანი ოკუპაციის შემდეგ დაუბრუნა. დასავლეთს, შეერთებულ შტატებს, სხვა ქვეყნებს მტკიცე პოზიცია ჰქონდათ და საბჭოთა კავშირში ამ სახელმწიფოების იძულებით გაერთიანებას არ აღიარებდნენ. ჩვენ ყირიმთან მიმართებაში ასევე ძალიან მკაცრი პოზიცია გვაქვს. ჩვენ რუსეთის მიერ ყირიმის ანექსიას არ დავეთანხმებით“, - განაცხადა კურტ ვოლკერმა.

მისი აზრით, „სწორი პოზიციის დაკავებაა“ საჭირო და „ერთხელაც ყირიმი უკრაინის შემადგენლობაში დაბრუნდება“.

ამ ინფორმაციას სააგენტო „უნიანი“ ავრცელებს.