როგორც სამთავრობო, ასევე საპარლამენტო გუნდი ყველაფერს ვაკეთებთ იმისთვის, რომ ჩვენი საზოგადოების მთავარი გამოწვევები მაქსიმალურად გონივრულ ვადებში გადავჭრათ, - ამის შესახებ იურიდიულ საკითხთა კომიტეტის თავმჯდომარე ანრი ოხანაშვილმა NDI-ის კვლევის შედეგების სოციალურ-ეკონომიკურ ნაწილთან დაკავშირებით განაცხადა.
მისი თქმით, მმართველი გუნდის მთავარი ამოცანა საზოგადოებაზე ზრუნვაა.
"ჩვენი როგორც სამთავრობო, ისე საპარლამენტო გუნდის მთავარი ამოცანაა ჩვენს საზოგადოებაზე ზრუნვა. ამ მიმართულებით პრემიერ-მინისტრმა გააჟღერა პოზიციები, რომ ეფექტური კომუნიკაცია ჩვენს საზოგადოებასთან, გადაწყვეტილებების დროულად მიღება და მთელი გუნდის სწორი კოორდინაცია ძალიან მნიშვნელოვანია. ჩვენ ვმუშაობთ, რომ კიდევ უფრო გაუმჯობესდეს კოორდინაცია და როგორც სამთავრობო, ასევე საპარლამენტო გუნდი ყველაფერს ვაკეთებთ იმისთვის, რომ ჩვენი საზოგადოების მთავარი გამოწვევები მაქსიმალურად გონივრულ ვადებში გადავჭრათ და ვიზრუნოთ იმაზე, რომ ვუთხრათ მათი საკითხები როდის იქნება მოგვარებული,"- განაცხადა ოხანაშვილმა.
შეგახსენებთ, რომ NDI -ის კვლევის მიხედვით, გამოკითხულთა 49 % ფიქრობს, რომ ქვეყანა არასწორი მიმართულებით ვითარდება, რაც ბოლო 10 წლის მანძილზე ყველაზე მაღალი მაჩვენებელია. ამასთან, გამოკითხულთა უმრავლესობისთვის მთავარ ეროვნულ საკითხად კვლავ სამუშაო ადგილები რჩება და გამოკითხულთა ნახევარს ჰქონია შემთხვევა, როცა კომუნალური გადასახადებისთვის თანხა არ გააჩნდა.