საპარლამენტო არჩევნებამდე ერთ წელზე მეტია დარჩენილი. აქედან გამომდინარე, ნაადრევია ყოველგვარი საუბარი კოალიციებზე, - ამის შესახებ პარლამენტის წევრმა ირაკლი კობახიძემ ჟურნალისტებს განუცხადა, რითაც გამოეხმაურა „ევროპული საქართველოს" განცხადებას, რომ აუცილებელია პოლიტიკურმა ძალებმა დააფიქსირონ პოზიცია, შეუქმნიან თუ არა კოალიციას „ქართულ ოცნებას“ არჩევნების შემდეგ.

ირაკლი კობახიძის თქმით, ამ თემის წამოწევა ხელოვნურია.

„პარტიები ჯერ უნდა მოემზადონ საპარლამენტო არჩევნებისთვის. არჩევნების შედეგებს უნდა დაველოდოთ და ამის საფუძველზეც ჩამოყალიბდება კოალიციები. ჯერ ისიც არ ვიცით, რომელი პარტიები მიიღებენ მონაწილეობას არჩევნებში, შეიძლება, ახალი პარტიები შეიქმნას, დაველოდოთ მოვლენების განვითარებას, ამის საფუძველზე გაირკვევა, ვინ ვისთან შეიძლება კოალიციაში შევიდეს.

რაც შეეხება "ევროპულ საქართველოს", გიგი უგულავამ აღნიშნა, ისინი კოალიციაში შესვლას პრორუსულ პარტიებთან აპირებენ და მინდა, მათ "წარმატება" ვუსურვო", განაცხადა კობახიძემ.