ქეთევან ციხელაშვილმა აფხაზეთის მეორე საჯარო სკოლის მოსწავლეებს ახალი სასწავლო წლის დაწყება მიულოცა

შერიგებისა და სამოქალაქო თანასწორობის საკითხებში სახელმწიფო მინისტრი ქეთევან ციხელაშვილი მოადგილესთან, ლია გიგაურთან ერთად, აფხაზეთის მეორე საჯარო სკოლაში იმყოფებოდა, სადაც მოსწავლეებს შეხვდა და მათ ახალი სასწავლო წლის დაწყება მიულოცა.

როგორც „ინტერპრესნიუსს“ შერიგებისა და სამოქალაქო თანასწორობის საკითხებში სახელმწიფო მინისტრის აპარატიდან აცნობეს, ღონისძიებაზე პირველკლასელებმა და აფხაზური ენის ჯგუფის მოსწავლეებმა ქორეოგრაფიული და მუსიკალური ნომრები წარმოადგინეს, აგრეთვე ლექსები აფხაზურ ენაზე. სახელმწიფო მინისტრმა მათ სიმბოლური საჩუქრები გადასცა.

„ძალიან გამორჩეული სკოლაა, პატარებს ძალიან მაღალი აკადემიური მოსწრება აქვთ. ისინი დევნილთა ოჯახებიდან არიან. იმ ადამიანების ოჯახებიდან, რომლებიც უკვე 25 წელზე მეტია გადაუჭრელი კონფლიქტის სიმძიმეს ყოველ დღე განიცდიან, მაგრამ მიუხედავად ამისა, შვილებს ძალიან კარგ განათლებას აძლევენ. ეს არის ერთადერთი სწორი გზა, რომლითაც ჩვენ აუცილებლად შევძლებთ დავძლიოთ ბარიკადები, რომლებიც დღეს ამ ადამიანებს საკუთარ სახლებში დაბრუნებაში ხელს უშლის და ძალიან ბევრ ოჯახს ყოფს. ამ სკოლაში ასწავლიან აფხაზურ ენას და მოსწავლეები მას ძალიან კარგად ფლობენ. ჩვენთვის ეს განსაკუთრებით მნიშვნელოვანია, რადგან აფხაზური კონსტიტუციით დაცული ენა გახლავთ. იგი არის ძალიან სერიოზული შემადგენელი ნაწილი აფხაზური იდენტობისა და ოკუპირებულ ტერიტორიებზე სწორედ მას დღეს განსაკუთრებული საფრთხე ემუქრება. ძალიან კარგად ვაცნობიერებთ, რომ მის დასაცავად, გადასარჩენად და განსავითარებლად განსაკუთრებული ზომებია საჭირო“,- განაცხადა სახელმწიფო მინისტრმა.

მან სასწავლო წლის დაწყება მიულოცა აფხაზეთისა და ცხინვალის რეგიონში მცხოვრებ მოსწავლეებსაც, რომელთაც, სასწავლო პროცესში მონაწილეობა ძალიან მძიმე პირობებში უწევთ. განსაკუთრებით გალსა და ახალგორში, სადაც მშობლიურ ენაზე სწავლა, ფაქტობრივად, სრულად იკრძალება.

„ასევე, ვულოცავ გამყოფ ხაზებთან მცხოვრებ ბავშვებს, რომლებიც მავთულხლართებს ყოველ დღე უპირისპირდებიან და მიუხედავად ამისა, ძალიან წარმატებულები არიან. მინდა მათ ერთი რამ ვუთხრა - დღეს შეუძლიათ გააკეთოთ ის, რაც მომავალში საქართველოს მშვიდობიანი გაერთიანების შესაძლებლობას მოგვცემს და იმგვარ საფრთხეებს აგვაცილებს, რასაც დღეს ვუპირისპირდებით. ეს არის კარგი განათლება და ამ განათლებით თითოეული მათგანის წარმატება და ამ ქვეყნის განვითარება“, - აღნიშნა ქეთევან ციხელაშვილმა.

ღონისძიებას ასევე ესწრებოდა აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი რუსლან აბაშიძე.

ლადო პაპავა - საქართველოში სტაბილურად არასტაბილური ვითარება მხოლოდ რუსეთის ინტერესებშია
ქართული პრესის მიმოხილვა 22.02.2020
ვიქტორ ყიფიანი - ევროკავშირი საქართველოს  რეგიონში მთავარ პარტნიორად მიიჩნევს და აღნიშნავს, რომ საქართველო სრულადაა ჩართული „აღმოსავლეთ პარტნიორობის“  მრავალმხრიან  არქიტექტურაში
სტუდენტზე ორიენტაცია, მოტივაციის ზრდა და კვალიფიკაციის ამაღლება - სტუ-ის რექტორის მიზნები და გეგმები
„მეტი ქართული პროდუქტის“ ინიციატივა „ვენდისთვის“ წარმატებული აღმოჩნდა
„ტერაბანკმა“ იურიდიული პირებისთვის მობაილბანკი შექმნა