არ მინდა, შევყვე ხაზარაძის სამწუხარო პოლემიკას, ვინაიდან ბევრად მეტი პასუხისმგებლობა მაქვს ანაკლიის პროექტთან დაკავშირებით, - ამის შესახებ რეგიონული განვითარებისა და ინფრასტრუქტურის მინისტრმა მაია ცქიტიშვილმა ჟურნალისტებს განუცხადა.

კითხვაზე, ანაკლიის პროექტის ინვესტორების მისამართით იყო თუ არა ნათქვამი ფრაზა: "ჩვენ თქვენნაირი ინვესტორები არ გვინდა", მაია ცქიტიშვილი აცხადებს, რომ ასეთი რამ ნათქვამი არ იყო. მინისტრის შეფასებით, ამ თემასთან დაკავშირებით სერიოზული კომენტარის გაკეთება უჭირს და ის "მამუკა ხაზარაძეს ჭორაობაში არ აჰყვება".

"ინვესტორებთან დაკავშირებით, რა თქმა უნდა, ვერ იქნებოდა ასეთი პასუხი და არც იყო. არ იყო არც ასეთი ფრაზა ნათქვამი. ანაკლიის პროექტთან დაკავშირებით არაერთხელ განვაცხადე, რომ სრული მზაობაა და ყველა ის ღონისძიება, რომელსაც ჩვენ ვახორციელებთ, არის მიმართული იმისთვის, რომ ეს პროექტი შედგეს. ამ კონკრეტულ შემთხვევაში ნამდვილად არ მინდა, შევყვე ძალიან სამწუხარო პოლემიკას ბატონ მამუკას მხრიდან, ვინაიდან ვგრძნობ ბევრად მეტი პასუხისმგებლობა მაქვს ამ პროექტთან დაკავშირებით და ზოგადად და ამ პროექტის ბედიც, როგორც ჩანს, უფრო მადარდებს. "- განაცხადა მინისტრმა.