ფრაქცია „პატრიოტთა ალიანსი და სოციალ-დემოკრატების“ თავმჯდომარე გიორგი ლომია და ფრაქციის წევრი ირმა ინაშვილი ევროპის საბჭოს საპარლამენტო ასამბლეის მონიტორინგის კომიტეტის წევრებს შეხვდნენ.
როგორც „ინტერპრესნიუსს“ საქართველოს პარლამენტიდან აცნობეს, შეხვედრაზე საუბარი პროპორციულ საარჩევნო სისტემას და ფრაქციის მიერ ინიცირებულ კანონპროექტებს შეეხო, რომელიც საარჩევნო პერიოდში ადმინისტრაციული რესურსის გამოყენებას და არჩევნებში სავალდებულო მონაწილეობას შეეხება.
„ასევე ვისაუბრეთ პოლიტიკური იარლიყების თემაზე და პოლიტიკური სპექტრის ხელოვნურად პროდასავლურებად და არაპროდასავლურებად დაყოფის თემაზე,“-განაცხადა ირმა ინაშვილმა.
ფრაქციის წევრებმა, ევროპის საბჭოს საპარლამენტო ასამბლეის მონიტორინგის კომიტეტის წევრებს საქართველოს ტერიტორიული მთლიანობის კონცეფცია და პლატფორმა გააცნეს, რომელიც სამხედრო მიუმხრობლობას უკავშირდება.
„ჩვენ ვისაუბრეთ საქართველოს ტერიტორიული მთლიანობის კონცეფციაზე და ამ თემის პერსპექტივებზე, ჩვენს პლატფორმაზე, რომელიც სამხედრო მიუმხრობლობას უკავშირდება და რაც არის პირველ რიგში დასავლური მოდელი. არავითარ შემთხვევაში ეს მოდელი არ ითვალისწინებს უარი ვთქვათ ევროინტეგრაციაზე. პირიქით, ეს არის ყველაზე უსაფრთხო, ყველაზე მშვიდობიანი და საქართველოსთვის, ამ ეტაპზე, ყველაზე მისაღები მოდელი“,-განაცხადა ირმა ინაშვილმა შეხვედრის დასრულების შემდეგ.
აღნიშნულ ინფორმაციას პარლამენტის პრესსამსახური ავრცელებს.