„ძალადობაზე განმცხადებელს ხშირად უწევს ისევ მოძალადის ოჯახში დაბრუნდეს იმის გამო, რომ ეკონომიკურად მოძალადეზეა დამოკიდებული,“ - ამის შესახებ სახალხო დამცველმა ნინო ლომჯარიამ პარლამენტის პლენარულ სხდომაზე ქალთა მიმართ ძალადობის პრობლემაზე საუბრისას განაცხადა.
მისი თქმით, მნიშვნელოვანია, რომ ქვეყანაში არსებობდეს ძალადობის მსხვერპლი ქალების ეკონომიკური მხარდაჭერის მექანიზმები.
„ქალთა მიმართ ძალადობის მიმართულებით მთავარ პრობლემას ვხედავ იმაში, რომ ძალადობის მსხვერპლი ქალის მიმართ არ არსებობს ეკონომიკური წახალისების და მხარდაჭერის მექანიზმები. განმცხადებელს ხშირად უწევს ისევ მოძალადის ოჯახში დაბრუნდეს ან როდესაც მოძალადე ციხეს ტოვებს, მასთან იცხოვროს იმის გამო, რომ მას არ აქვს სამუშაო, ეკონომიკურად სრულად არის დამოკიდებული მოძალადეზე და განმეორებით ხდება კიდევ უფრო მძიმე ძალადობის მსხვერპლი. ამიტომ ჩვენი რეკომენდაცია არის ის, რომ 3-თვიანი თავშესაფარი მნიშვნელოვანია, თუმცა არ არის საკმარისი. 3 თვის გასვლის შემდეგ, ქალები ცხოვრობენ ძალიან დიდ შიშში,“ - განაცხადა ნინო ლომჯარიამ.