ხალხი დაიღალა ლაპარაკის მოსმენით, მას ქმედითი ნაბიჯების დანახვა სურს, - ამის შესახებ ეროვნულ დემოკრატიული ინსტიტუტის პროგრამების მენეჯერმა მელისა მუსიომ „ამერიკის ხმის” ქართულ გამოცემასთან ინტერვიუში განაცხადა.

მელისა მიუსო ინტერვიუში NDI-ის ბოლო კვლევაზე საუბრობს და ამბობს, რომ ქვეყნის განვითარების მიმართულებით ახლა ყველაზე ცუდი მონაცემებია, ვიდრე აქამდე ყოფილა, აღნიშნულს კი ქვეყანაში არსებულ ეკონომიკურ ფონს უკავშირებს.

„ახლა ყველაზე ცუდი მონაცემები გვაქვს, ვიდრე ეს აქამდე იყო. რესპონდენტების 49% ამბობს, რომ ქვეყანა არასწორი მიმართულებით მიდის და მხოლოდ 18% ფიქრობს, რომ ქვეყანა სწორი გზით ვითარდება. საინტერესოა, რომ ამ კვლევაში ჩვენ ქვეყნის მიმართულების ტრენდები ლარის ღირებულებას შევადარეთ. როდესაც ლარი გამყარებულია, მაშინ ხალხი თვლის, რომ ქვეყანა სწორი მიმართულებით მიდის, ხოლო როდესაც ლარი უფასურდება, ხალხის რაოდენობა, ვინც თვლის, რომ ქვეყანა არასწორი მიმართულებით ვითარდება, იზრდება. ეს გვაჩვენებს, რომ არსებობს ძალიან მყარი კორელაცია ეკონომიკასთან. ესაა ის, რითაც მოსახლეობა შეშფოთებულია, რაზეც ხალხს სურს ყურადღების გამახვილება. როდესაც ხალხი ეკონომიკით იმედგაცრუებულია, სწორედ მაშინ იცვლება მათი აღქმა ქვეყნის განვითარებასთან დაკავშირებითაც“, - აცხადებს მელისა მუსიო.