მაია ცქიტიშვილი - რამდენიმე წლის წინ ვცხოვრობდით ქვეყანაში, სადაც ავტორიტარული საპრეზიდენტო მმართველობა გვქონდა

„ევროსაბჭოს ადგილობრივი და რეგიონული კონგრესის როლი საქართველოს ადგილობრივი დემოკრატიის განვითარებაში“ - თბილისის საკრებულოს შენობაში დღეს ამ სახელწოდებით კონფერენცია გაიხსნა, რომლის მონაწილეებსაც სიტყვით ვიცე-პრემიერმა, რეგიონული განვითარებისა და ინფრასტრუქტურის მინისტრმა მაია ცქიტიშვილმა მიმართა.

როგორც „ინტერპრესნიუსს“ საქართველოს რეგიონული განვითარებისა და ინფრასტრუქტურის სამინისტროდან აცნობეს, მაია ცქიტიშვილმა თვითმმართველობის განვითარებაზე და აღნიშნული მიმართულებით წარსულში არსებულ გამოცდილებაზე ისაუბრა.

„როდესაც ვსაუბრობთ საქართველოში ადგილობრივი დემოკრატიის და თვითმმართველობის განვითარებაზე, ძალიან ბევრი რამ უკვე გავაკეთეთ, მაგრამ ვიცით, რომ წინ კიდევ უფრო დიდი გზა გვაქვს გასავლელი. ხშირად გვავიწყდება რა გზა გამოვიარეთ, სულ რამდენიმე წლის წინ ვცხოვრობდით ქვეყანაში, სადაც პრაქტიკულად ავტორიტარული საპრეზიდენტო მმართველობა გვქონდა, ადგილობრივი თვითმმართველობის ხელმძღვანელები ინიშნებოდნენ პრეზიდენტის მიერ და ასევე მარტივად იხსნებოდნენ სამსახურიდან თუ არ შეესაბამებოდნენ გაცხადებულ პოლიტიკას,“ - აღნიშნა მაია ცქიტიშვილმა.

ვიცე-პრემიერის თქმით, დღეს თვითმმართველობების ხელმძღვანელებს მოსახლეობა ირჩევს პირდაპირი წესით და კონსტიტუციის დონეზეა გამყარებული სტანდარტი, რომელიც ქვეყნის პოლიტიკურ ცხოვრებაში ადგილობრივი თვითმმართველობების როლს განსაზღვრავს.

„ამ პროცესის ლოგიკური გაგრძელებაა ინიციატივა, რომელიც 2025 წლამდე თვითმმართველობების კიდევ უფრო გაძლიერებას ისახავს მიზნად და მთლიანი შიდა პროდუქტის 7 %- მდე ადგილობრივი თვითმმართველობებისთვის გადანაწილებას გულისხმობს. ამასთან ერთად, უზრუნველყოფილი უნდა იყოს ადგილებზე მეტი ფუნქციისა და მართვის რეალური ინსტრუმენტების გადაცემა. ყველაფერი ეს უკვე აისახა დეცენტრალიზაციის სტრატეგიის დოკუმენტში, რომელსაც სულ ცოტა ხანში იმედი გვაქვს, რომ მივიღებთ,“ - განაცხადა მაია ცქიტიშვილმა.

რეგიონული განვითარებისა და ინფრასტრუქტურის მინისტრმა ასევე აღნიშნა, რომ ამბიციური დღის წესრიგის ფარგლებში, უკვე წელს ადგილობრივ თვითმმართველობებს პირველად ჰქონდათ შესაძლებლობა და შესაბამისი ფინანსური რესურსი, რომ გაეფართოებინათ კომპეტენცია მუნიციპალიტეტების ტერიტორიაზე არსებული სკოლების რეაბილიტაციისა და მოსწავლეთა ტრანსპორტირების ნაწილში. ასევე, გამარტივდა გრანტების, სესხების აღების წესები და შეიცვალა დაფინანსების ფორმულა.

„ეს არის მაგალითი იმისა თუ რა გაკეთდა ბოლო წლებში, დეცენტრალიზაციის სტრატეგიის მიღებამდე. მომავალი წლისთვის გვაქვს არანაკლებ ამბიციური გეგმები როგორც სერვისების განვითარების, ასევე კვალიფიკაციის ამაღლების ნაწილში. სწორედ ერთობლივი მუშაობის შედეგია ის უპრეცედენტო მასშტაბისა და რაოდენობის პროექტები, რომელსაც ვახორციელებთ მუნიციპალიტეტებში. ასევე, ძალიან კარგად გვესმის მოქალაქეების წინაშე ჩვენი პასუხისმგებლობა და რა თქმა უნდა, ისიც, რომ ადგილობრივი თვითმმართველობა არის ის რგოლი, რომელიც ყველაზე ახლოსაა მოსახლეობასთან. ამიტომ, ბუნებრივია მაქსიმალურად ვცდილობთ მუნიციპალიტეტების მართვის პროცესში უშუალოდ მოქალაქეების ჩართულობას შევუწყოთ ხელი,“ - აღნიშნა მაია ცქიტიშვილმა.

ღონისძიება, რომელიც საქართველოში ადგილობრივი დემოკრატიის გაძლიერებას ისახავს მიზნად, ევროსაბჭოში საქართველოს გაწევრიანების მე-20 წლისთავს, ევროსაბჭოს 70-ე წლისთავს და კონგრესის 25-ე წლისთავს ეძღვნება.

თენგიზ ფხალაძე - ვინც ანაკლიის პორტის მიზანშეწონილობას ეჭვქვეშ აყენებს, იქნებ იმაზეც დაფიქრდეს, რატომ აჩქარებს რუსეთი ტამანში საკუთარი პორტის მშენებლობას?
ქართული პრესის მიმოხილვა 17.10.2019
ზურაბ ბატიაშვილი - სირიაში შექმნილი სიტუაციიდან ყველაზე მოგებულ პოზიციაში რუსეთი აღმოჩნდა, რაც ცუდი სიგნალია პროდასავლური ქვეყნებისა და ძალებისთვის
რატომ და რამდენით შემცირდა საკრედიტო ბარათების საპროცენტო განაკვეთი საქართველოში
კომპანია „ჰიდროდიაგნოსტიკამ“ ჟინვალჰესის ადრეული შეტყობინების პროექტზე მუშაობა დაასრულა და სატესტო რეჟიმში გაუშვა
„ვენდიმ“ „რაგბი მენიუს“ გათამაშების პირველი ნაკადის გამარჯვებული რაგბის გულშემატკივრები დააჯილდოვა
პროექტი „სტარტაპ ანბანი“ "ტერაბანკის" მხარდაჭერით გრძელდება
Wolt და Mastercard მომხმარებელს ახალ, შეუფასებელ აქციას სთავაზობს
"ჯადოსნური ახალი წელი აბუ დაბიში" - ლიბერთის და VISA-ს ერთობლივი კამპანია მხოლოდ Apple Pay-ს მომხმარებლისთვის დაიწყო