საქართველოს პრეზიდენტი სალომე ზურაბიშვილი დღეს გაეროს გენერალური ასამბლეის 74-ე სესიაზე სიტყვით გამოვა.
ზურაბიშვილი მსოფლიო ლიდერებს თბილისის დროით 19:00- 20:30 საათების შუალედში მიმართავს.
გენერალურ ასამბლეაზე, 24-30 სექტემბერს, ნიუ-ორკში თავს იყრის მსოფლიოს 100- ზე მეტი ქვეყნის ლიდერი და რამდენიმე ათასი დიპლომატი.
პრეზიდენტის პრესსამსახურის ინფორმაციით, წელს გენერალური დებატების მთავარი თემაა: „სიღარიბის აღმოფხვრის, ხარისხიანი განათლების, კლიმატის მიმართულებით ახალი მოქმედებებისა და ინკლუზიისათვის მრავალმხრივი ძალისხმევის მობილიზება."
ნიუ-იორკში ვიზიტის ფარგლებში სალომე ზურაბიშვილი ორმხრივ შეხვედრებსაც მართავს.
შეგახსენებთ, რომ ბოლო წლებში გაეროს გენერალურ ასამბლეაზე საქართველოს პრემიერ-მინისტრი წარმოადგენდა, ვინაიდან „ქართული ოცნების“ ხელისუფლების წარმომადგენლები მიიჩნევდნენ, რომ საპარლამენტო მოდელის პირობებში აღნიშნული უფლებამოსილება პრეზიდენტს აღარ ეკუთვნოდა და პრემიერ-მინისტრის კომპეტენციას შეადგენდა. შესაბამისად, საქართველოს ხელისუფლების გადაწყვეტილებით, წინა პრეზიდენტ გიორგი მარგველაშვილს გაეროს გენერალურ ასამბლეაზე სიტყვით გამოსვლის საშუალება არასდროს მისცემია. ხელისუფლების აღნიშნული პოზიცია მხოლოდ სალომე ზურაბიშვილის გაპრეზიდენტების შემდეგ შეიცვალა.