ლია გიგაური პანკისის ხეობის სოფლებში - საკობიანოში, ქორეთში, ყვარელწყალსა და დუისში იმყოფებოდა

შეხვედრებზე წამოწეული ყველა საკითხი მომავალი წლის ბიუჯეტის დაგეგმვისას აუცილებლად გათვალისწინებული იქნება, - ამის შესახებ შერიგებისა და სამოქალაქო თანასწორობის საკითხებში სახელმწიფო მინისტრის მოადგილე ლია გიგაურმა პანკისის ხეობის სოფლებში - საკობიანოში, ქორეთში, ყვარელწყალსა და დუისში ვიზიტისას განაცხადა, სადაც ადგილობრივ მოსახლეობას შეხვდა. როგორც „ინტერპრესნიუსს“ შერიგებისა და სამოქალაქო თანასწორობის საკითხებში სახელმწიფო მინისტრის პრესსამსახურიდან აცნობეს, შეხვედრების მიზანი მოსახლეობისაგან მათი საჭიროებების შესახებ ინფორმაციის მიღება იყო, რათა მომავალი წლის ბიუჯეტი იმგვარად დაიგეგმოს, რომ მათ მოსაგვარებლად საჭირო სახსრები გამოიყოს.

გამოწვევების გაზიარების გარდა, შეხვედრებზე ოთხი სოფლის მოსახლეობამ რეგიონში დაგეგმილი სიახლეების შესახებაც მოისმინეს. ადგილობრივებს საკუთარი მოსაზრებებისა და ხედვების გამოთქმის შესაძლებლობაც მიეცათ.

სახელმწიფო მინისტრის მოადგილის შეფასებით, მოსახლეობასთან შეხვედრა ინფორმაციული თვალსაზრისით სასარგებლო და ამავდროულად აუცილებელია, რათა გადაწყვეტილების მიღების პროცესში მათი ჩართულობა უზრუნველყოფილ იქნას.

„მეორე დღეა პანკისის ხეობის მოსახლეობას ვხვდებით და მათგან სოფლების საჭიროებების შესახებ ვისმენთ. ამ ორ დღეში რვა სოფლის მოსახლეობამ გამოკვეთა ის მიმართულებები, რომლებიც ხეობისათვის სასიცოცხლოდ მნიშვნელოვანია. პრიორიტეტულად შეიძლება დასახელდეს სასმელი წყლისა და გზების პრობლემა. თუმცა, ძალიან საინტერესო იყო ახლაგაზრდების მიერ წამოწეული საკითხები - კულტურის ცენტრების შექმნა და განვითარება, სხვადასხვა სახელოვნებო წრის გახსნა და რაც მთავარია, ვაინახური კულტურის პოპულარიზაციის მიზნით სხვადასხვა აქტივობის განხორციელება. ამ მხრივ მათ სხვადასხვა სტრუქტურის წარმომადგენლისაგან წინასწარი თანხმობა მიიღეს. მოსახლეობასთან შეთანხმება შედგა და შეხვედრებზე წამოწეული ყველა საკითხი ბიუჯეტის დაგეგმვისას აუცილებლად გათვალისწინებული იქნება. რამდენიმე თვის შემდეგ მათ ისევ შევხვდებით და შედეგს გავაცნობთ“, - განაცხადა ლია გიგაურმა.

შეხვედრებს ასევე ესწრებოდნენ სახელმწიფო რწმუნებული კახეთის რეგიონში ირაკლი ქადაგიშვილი, პარლამენტის წევრები - ენძელა მაჭავარიანი და გელა სამხარაული და ადგილობრივი თვითმმართველობის წარმომადგენლები.

ვაჟა ბერიძე - გაუგებარია საზოგადოების რა ნაწილს წარმოადგენს მმართველი ძალა და ვისთვისაა „ოცნების“ ხელისუფლებაში დარჩენა სისხლხორცეულად აუცილებელი
ქართული პრესის მიმოხილვა 19.10.2019
თენგიზ ფხალაძე - ვინც ანაკლიის პორტის მიზანშეწონილობას ეჭვქვეშ აყენებს, იქნებ იმაზეც დაფიქრდეს, რატომ აჩქარებს რუსეთი ტამანში საკუთარი პორტის მშენებლობას?
აჭარული სოფლები და მთები, როგორც ოთხივე სეზონის ტურისტული პროდუქტი
„ლიბერთი ბანკის“ მხარდაჭერით, ახალი, ინოვაციური ონლაინ პლატფორმა - onoff.ge შეიქმნა
„ჯიპიაი ჰოლდინგი“ ყველა ავტომფლობელს სტიქიური რისკებისგან დაზღვევას უფინანსებს