ეროვნული ბანკის საბჭოს წევრად გიორგი მიროტაძის კანდიდატურას პარლამენტი აღარ განიხილავს. როგორც „ევროპული საქართველოს“ წევრმა ირმა ნადირაშვილმა „ინტერპრესნიუსს“ განუცხადა, მას შემდეგ, რაც საზოგადოებამ შეწყალების სკანდალი იხილა, კანდიდატურის მოხსნა გიორგი მიროტაძემ თავად ითხოვა.

„შეწყალების სკანდალის შემდეგ პარლამენტში გიორგი მიროტაძის განცხადება შემოვიდა, სადაც ითხოვს, რომ აღარ განიხილონ მისი კანდიდატურა. ეს იმას ნიშნავს, რომ მის კანდიდატურას პარლამენტი ვეღარ განიხილავს, მაგრამ რომ არა შეწყალების სკანდალი, განიხილავდა. მისი კანდიდატურა უკვე განხილულიც იყო ერთ-ერთ კომიტეტზე. განცხადება, სადაც ითხოვს, რომ აღარ განიხილონ, შემოსულია 25 სექტემბერს, 2 დღით ადრე იქამდე, ვიდრე პროკურატურაში გამოკითხვაზე მივიდოდა,“- განაცხადა ირმა ნადირაშვილმა „ინტერპრესნიუსთან“.

შეგახსენებთ, ირმა ნადირაშვილმა დღეს განაცხადა, რომ გიორგი მიროტაძე, რომელიც პრეზიდენტმა ეროვნული ბანკის საბჭოს წევრის კანდიდატად წარადგინა, პრეზიდენტის საპარლამენტო მდივნის დიმიტრი გაბუნიას ყოფილი პარტნიორია იურიდიულ კომპანიაში. ირმა ნადირაშვილი ამბობს, რომ ის პროკურატურაში შეწყალების საქმესთან დაკავშირებით იყო დაბარებული. დეპუტატი ნეპოტიზმზე და პრეზიდენტის ადმინისტრაციაში დიმიტრი გაბუნიას გავლენებზე მიუთითებს და პროკურატურას ამ საკითხით დაინტერესებისკენ მოუწოდებს.

იხილეთ ვიდეო