ხაჭაპურს მამაკაცებიც კარგად აცხობენ, - ასე ეხმიანება დამოუკიდებელი დეპუტატი ეკა ბესელია საზოგადოებრივი მოძრაობა „ლელოს" დამფუძნებლის, მამუკა ხაზარაძის განცხადებას, რომელიც მან რეგიონული განვითარებისა ინფრასტრუქტურის მინისტრის, მაია ცქიტიშვილის შესახებ გააკეთა.
როგორც ეკა ბესელია განმარტავს, მაია ცქიტიშვილზე დიდი წარმოდგენის არც თავად არის, თუმცა საჯარო სივრცეში მყოფი ქალების მიმართ ასეთ გამონათქვამებს ვერ მიესალმება და არ მოსწონს.
„არც ის ვიცი, როგორ აცხობს ხაჭაპურს და არც იმ აზრის ვარ, რომ მხოლოდ ქალებთან მიმართებით შეიძლება გამოიყენო ასეთი ფორმულირება, რომელიც კულინარიას და სამზარეულოს უკავშირდება“, - განაცხადა ეკა ბესელიამ.
შეგახსენებთ, მამუკა ხაზარაძემ მთავრობის მუშაობის შეფასებისას მაია ცქიტიშვილთან დაკავშირებით განაცხადა, რომ „მაია ცქიტიშვილი შეიძლება კარგად აცხობს ხაჭაპურს, მაგრამ წარმოდგენა არ აქვს, რა არის ინფრასტრუქტურა“.