თემქაზე მოკლული 20 წლის ანა ნაცვლიშვილის მკვლელობაში მსჯავრდებული ლადო გრიგალაშვილის ადვოკატის, ნაირა ოტიაშვილის უფლებადამცველი ონისე მარგიანი მისი დაცვის ქვეშ მყოფის აღკვეთის ღონისძიების გარეშე დატოვებას მოითხოვს. აღნიშნულის შესახებ მარგიანმა "ინტერპრესნიუსს" განუცხადა.

როგორც მარგიანი განმარტავს, მისთვის დანამდვილებით ცნობილი არ არის, პროკურატურამ პოზიცია შეცვალა თუ არა, ოტიაშვილის პატიმრობის მოთხოვნასთან დაკავშირებით. "გირაოს მოთხოვნასთან დაკავშირებით ინფორმაცია რამდენად დადასტურდება, არ ვიცი. თუ პროკურატურა პატიმრობასთან დაკავშირებით პოზიციას შეცვლის, ჩვენ ჩავთვლით, რომ ბრძოლა მაინც არ დაგვისრულებია, ბრძოლას საბოლოო გამარჯვებამდე, გამართლებამდე გავაგრძელებთ. მნიშვნელოვანია, ადვოკატი რომ გარეთ იქნება, მაგრამ საერთოდ არ უნდა ყოფილიყო შიგნით. მადლობას ვერ გადავუხდით, პატიმრობა გირაოთი თუ შეცვალეს. ისევ ნაწყენი ვართ და ბრძოლას ისევ გავაგრძელებთ. დარწმუნებული ვარ, მოსამართლე მას აღკვეთის გარეშე დატოვებს, ნამცეცი ნამუსი მაინც თუ ექნება", - განაცხადა მარგიანმა.

როგორც "ინტერპრესნიუსისთვის" გახდა ცნობილი, პროკურატურა ნაირა ოტიაშვილისთვის აღკვეთის ღონისძიების სახით 3000-ლარიანი გირაოს გამოყენებას მოითხოვს.

ამ წუთებში, თბილისის საქალაქო სასამართლოსთან ნაირა ოტიაშვილის მხარდასაჭერად მისი კოლეგები იკრიბებიან.